Millimiz iyunun 17-də AÇ-2024-ün seçmə mərhələsində Estoniya ilə qarşılaşacaq.

"Football-plus.az" xəbər verir ki, qarşılaşma Canni de Byazi üçün çox vacibdi. Burdakı nəticə onun millidəki taleyini həll edə bilər. İtaliyalıdan rəhbərliyin əsas tələbi qələbə qazanmaqdı. Bu səbəbdən də baş məşqçi doğma meydanda 3 xal əldə etmək istəyəcək.

Düşünmək olar ki, buna uyğun da "11-lik" meydana buraxacaq. De Byazinin 4-lü müdafiə sistemi ilə oynayacağını söyləmək olar. Bəs italiyalı hansı futbolçulara güvənəcək. Bunu təxmin etmək o qədər də çətin deyil:

Qapıda Şahruddin Məhəmmədəliyev yer alacaq, müdafiənin solunda Elvin Cəfərquliyev oynayacaq. Mərkəzdə Bəhlul Mustafazadə ilə Bədavi Hüseynov çıxış edəcək. Höccət Haqverdi sağ cinahda top qovacaq. Yuxarıda qeyd etdiyimiz kimi, De Byazinin məqsədi 3 xal olacaq. Bu səbəbdən də o, yarımmüdafiədə Emin Mahmudov, Filip Ozobiç, Aleksey İsayev "üçlüy"ünə güvənəcək. Ramil Şeydayev sol, Mahir Emreli sağ cinah vingeri olacaq. Hücumun mərkəzində isə Renat Dadaşov oynayacaq.

Hansı heyəti oynatmasından asılı olmayaraq, De Byazinin başçılıq etdiyi komandanın 3 xal qazanacağına ümid edək.

İLKİN SULTANLI