9 ildən sonra premyer-liqaya dönən, Ayxan Abbasovun rəhbərliyi altında uğurlu mövsüm keçirən “Turan Tovuz” hazırda istirahətdə olsa da, rəhbərlik transfer çalışmalarını davam etdirir.

“Boz qurd”un “Sumqayıt”dan ayrılan Aydın Bayramovla ortaq məxrəcə gəldiyini ötən saylarımızın birində xəbər vermişdik.

"Football-plus.az" xəbər verir ki, Qərb təmsilçisi daha iki futbolçunun məsələsini həll edib. Söhbət Xəyal Nəcəfovla Veysəl Rzayevdən gedir. Xəyal ötən mövsümü icarə əsasında “Turan Tovuz”da keçirsə də, “Neftçi” ilə müqavilə müddətinin başa çatmasına daha bir il var. Ayxan bəy onun xidmətində maraqlı olduğundan iki klub arasında əldə olunan razılığa əsasən, “10 nömrə” qarşıdakı mövsümdə icarə əsasında tovuzluların şərəfini qoruyacaq. “Sabah”la müqaviləsi davam edən Veysəl də Xəyalla eyni aqibəti yaşayacaq. “Tələbələr”in rəhbərliyi dayaq yarımmüdafiəçisinin daha bir il Tovuzda qalmasına icazə verib. Ötən mövsüm “Kəpəz”də özünü yaxşı tərəfdən göstərən Fəird Nəbiyev də Tovuza üz tutub. Yarımmüdafiəçi ilə yaxın günlərdə rəsmi müqavilə bağlanacaq.

“Boz qurd”un rəhbərliyini ən çox narahat edən başa çatan mövsümdə vurduğu 16 qolla komandaya böyük fayda verən Runi Evanın yeni müqaviləyə imza atıb-atmayacağıdı. Ötən saylarımızın birinə açıqlama verən Ayxan Abbasov kamerunlu forvarddan cavab gözlədiklərini bildirmişdi. Kluba yaxın mənbədən əldə etdiymiz bilgiyə görə, Eva hələ ki gözləmə mövqeyindədi. Ötən mövsüm 3000 dollar məvacib alan forvarda tovuzlular yeni mövsüm üçün daha çox maaş vermək niyyətindədi. Rəsmilər ona aylıq 5000 dollarlıq anlaşma təklif edib. Natan Oduvanın da karyerasını harda davam etdirəcəyi sual altındadı. İngiltərəli futbolçuya da eyni sözlər deyilib. Xatırladaq ki, ötən mövsüm aylıq 2500 dollara oynayan oyunçuya yeni təklif olunan anlaşmada daha çox əməkhaqqı nəzərdə tutulub.

Sonda onu da bildirək ki, qərblilər iyunun 28-i və ya 30-da Bakıda toplanışa başlayacaq. Dəqiq tarix baş məşqçinin verəcəyi qərardan asılıdı. İyulun 10-da isə “boz qurd” Türkiyəyə yollanacaq. Öncədən də xəbər verdiymiz kimi, komanda hazırlığın ikinci mərhələsini Ankara yaxınlığındakı Qızılcahamam bölgəsində keçirməyi planlaşdırır.

RƏŞAD