Konfrans Liqasının 2022/23 mövsümünün laureatları müəyyənləşib. Mövsümün ən yaxşı oyunçusu adını Deklan Rays qazanıb.


"Football-plus.az" xəbər verir ki, “Vest Hem”in yarımmüdafiəçisi UEFA-nın texniki müşahidəçilər qrupunun rəyi əsasında 1-ci yerə layiq bilinib. Kapitan sarğısını daşıyan 24 yaşlı Rays turnirdə keçirdiyi 11 oyunda 1 qolun və 1 məhsuldar ötürmənin müəllifi olub, onun ötürmələrinin 92,6 faizi dəqiq alınıb. Deklanın hər oyunda orta hesabla 11,33 km məsafə qət etdiyini və hər oyunda ən yüksək orta sürətinin 31,4 km/saata bərabər olduğunu da qeyd edək.
Mövsümün ən yaxşı gənc futbolçusu üçün ayrılan mükafata isə Andi Diuf sahib çıxıb. “Bazel”in 20 yaşlı fransalı yarımmüdafiəçisi turnirdə keçirdiyi 14 oyunda 3 qolun və 2 məhsuldar ötürmənin müəllifi olub, onun ötürmələrinin 80,7 faizi dəqiq alınıb.

Qeyd edək ki, transfer hüququ “Renn”ə məxsus olan Andi “Bazel”də icarə əsasında çıxış edir. O, son mövsümdə Fransanın gənclərdən ibarət komandasında debüt edib.