Son illərdə heyətdə radikal dəyişikliklər etməkdən çəkinən “Real”da bu yay artıq indidən yeniliklər başlayıb.


"Football-plus.az" xəbər verir ki, bilindiyi kimi, Madrid nəhəngi 4 oyunçu – Benzema, Asensio, Azar və Dias ilə vidalaşıb. Artıq heyətə yeni oyunçular cəlb olunur. Bunlardan biri “Xetafe”nin təcrübəli qapıçısı David Soriyadı. Onun gələn mövsüm Tibo Kurtuanın əvəzləyicisi olacağı və 2-ci qapıçı statusunu daşıyacağı gözlənilir. Ukraynalı qapıçı Andrey Lunin isə Madridi tərk etmək və özünə yeni klub axtarmaq qərarına gəlib. Soriya “Real”ın öz yetirməsidi. 30 yaşlı qapıçı geridə qoyduğumuz mövsüm La Liqada 38 matçın hamısında meydana çıxıb və bunların 15-də qapısını yoxunulmaz saxlayıb. “Blankos”un heyətinə cəlb etdiyi digər futbolçu da klubun öz yetirməsidi. Söhbət “Rayo Valyekano”lu Fran Qarsiyadan gedir. Müdafiənin sol cinahında top qovan 23 yaşlı futbolçu 2020-də məhz elə “Real”dan “Valyekano”ya yollanmışdı. İspaniya mətbuatının yazdığına inansaq, bu transfer Madrid nəhənginə 5 milyon avroya başa gəlib. Son mövsümdə Qarsiya “Valyekano”nun heyətində La Liqada sahə oyunçuları arasında hamıdan çox – 3408 dəqiqə meydanda olub. Onun hesabında 2 qol, 3 məhsuldar ötürmə var. Maraqlıdı ki, qollardan birini “Barselona”ya, digərini isə “Atletiko”ya vurub. Ferlan Mendinin tez-tez zədələndiyini və “Real”ın müdafiənin sol cinahı ilə bağlı problem yaşadığını nəzərə alsaq, bu transfer anlaşılandı.

Ulduz transferlərinə gəlincə, burda hələ ki şayiələrdən başqa heç nə yoxdu. Benzema ayrılandan sonra “Real”ın hücuma kimi transfer edəcəyi böyük maraqla gözlənilir. Harri Keyn “Real”da oynamağa razıdı. Amma “Real” ilə “Tottenhem” maliyyə məsələsində razılıq əldə etməkdən çox uzaqdı. Paytaxt klubunun diqqət mərkəzində olan digər futbolçu Kay Havertsdi. “Telegraf” nəşrinin yazdığına görə, istedadlı almaniyalı futbolçu Madridə gəlməyin əleyhinə deyil. Amma Keyn məsələsində olduğu kimi, burda da “Real”dan böyük pullar tələb olunur. “Çelsi” oyunçusuna görə ən azı 70 milyon avro tələb edir. Tərəflər arasında danışıqlar davam edir. “Real”ın veteranı, Havertsin həmyerlisi Toni Kroos da onun Madridə gəlməsi üçün əlindən gələni edir. Karlo Ançelottinin komandasının göz qoyduğu digər tanınmış futbolçu isə “Bavariya”lı Alfonso Devisdi. 22 yaşlı kanadalı futbolçunun meneceri Nik Xuose “Real” kimi klubun onun müştərisinə maraq göstərməsinin qürurverici olduğunu bildirib. Amma o, hələ ki ortada heç bir anlaşmanın olmadığını qeyd edib.