Millimizin üzvü Cəlal Hüseynov karyerasını ölkə xaricində davam etdirəcək. Müdafiəçi Bolqarıstan “Arda”sı ilə razılaşıb. 20 yaşlı futbolçu Kırcali təmsilçisi ilə 3 illik müqavilə bağlayıb.

“Fooball-plus.az” saytı olaraq “Arda”nı sizə yaxından tanıtmaq qərarına gəldik.

Tarixi

Klub 1924-cü il oktyabrın 13-də qurulub. Həmin vaxt şəhərin idman cəmiyyətinin futbol assosasiyası tərəfindən təsis olunub. Klub əvvəlcə “Rodopski Sokol” adlanıb. Daha sonra ad dəyişikliyi baş verib. Bu dəfə “Arda” olaraq fəaliyyətinə davam edib. 1945-ci ildən 1957-ə kimi “Minyor” adı ilə mübarizə aparıb. 1958-dən isə əsas ad geri qaytarılıb.

Maristsa çayının qolu olan Ardanın adını daşıyan klubun rəngləri göy və ağdı. Kırcali təmsilçisinin 2 ləqəbi var: “Kırcalidən mavilər” və “Rodop dağının ağaları”. Komanda oyunlarını 11114 nəfərlik “Arda Arena”da keçirir. Daha çox Bolqarıstanın ikinci liqasında mübarizə aparıb. Burda ən yaxşı nəticəsi ikincilik olub. Həmin uğuru 1955/56 mövsümündə əldə edib. Bolqarıstan kubokunun 1/4 finalına da vəsiqə qazanıb. Bu isə 1959/60ı “futbol ili”nə təsadüf edib. 2013-cü ildə maliyyə problemləri yaşayan “Arda” fəaliyyətini dayandırıb. 2015-də bağlı olduğu qurum ləğv edildiyinə görə yenidən bərpa olunub və Region Liqasında çıxış edib. 2018/19 mövsümündə əsas liqaya yüksəlmək uğrunda pley-offun finalında “Septemvri”ni (Sofiya) məğlub edib.

“PSİ Group” tərəfindən satın alınıb

2017-ci il iyunun əvvəlində Bolqarıstanın yol tikinti şirkəti “PSİ Group” tərəfindən “Ludoqorest”in yerli və beynəlxalq uğurlarından ilhamlanaraq futbol layihəsini inkişaf etdirmək cəhdi ilə satın alındı. Bir il ərzində komandanın formalaşdırılması və infrastrukturun qurulması üçün 1 milyon avroya yaxın vəsait xərcləndi. 2017/18 mövsümündə həvəskarlar kubokunu qazanan “Arda” Bolqarıstanın ikinci liqasına vəsiqə qazanıb. İlk mövsümdə yüksək liqada qalmağı bacaran kollektiv 2021/22 “futbol ili”ndə kubokun finalında ÇSKA-ya (Sofiya) 0:1 hesabı ilə məğlub olub. Konfrans Liqasına vəsiqə qazanmaq uğrunda görüşdə “Çerno More”ni (Varna) məğlub edərək tarixində ilk dəfə bu turnirə vəsiqə qazanıb. Burda ilk mərhələdə “Hapoel” (Beer-Şeva) ilə qarşılan kollektiv 0:2 və 0:4 hesarı ilə uduzaraq mübarizəni dayandırıb.

Nəticə

Göründüyü kimi, Cəlal Hüseynov o qədər də zəif komandaya yollanmayıb. 2022/23 mövsümünü 8-ci pillədə başa vuran “Arda”nın qarşıdakı əsas hədəfi avrokuboklara vəsiqə qazanmaqdı. Cəlalın transferi də buna hesablanan addımdı.

İLKİN SULTANLI