İstanbulda baş tutacaq Çempionlar Liqasının finalından öncə sabiq futbol ulduzlarının iştirakı ilə ''Əfsanə Çempionlar Turniri'' təşkil olundu.

"Football-plus.az" xəbər verir ki, ''Yenikapı Festival Park''da keçirilən turnirdə 4 komanda iştirak etdi.

Luiş Fiqu, Alessandro Nesta, Kafu və Həmit Altıntop öz komandalarının kapitanı idi. Türkiyə Futbol Federasiyasının prezidenti Mehmet Büyükekşi həm ilk matçın başlama zərbəsini həyata keçirdi, həm də turniri təqib etdi.

Oyunlar 15 dəqiqəlik 2 hissədən ibarət idi. Kafunun komandasında Julio Sezar, Marko Materatsi, Esteban Kambiasso, Qaizka Mendieta, Rober Pires, Patrik Vieyra, Vladimir Şmiçer Patrik Klyuvert yer aldı. Nesta öz komandasına Vitor Baya, Roberto Karlos, Lusio, Mikael Essyen, Klod Makelele, Klarens Zeedorf, Yaya Ture, Rikardo Kuarejmanı götürmüşdü. Fiqunun kollektivində Sərdar Kulbilgə, Erik Abidal, İvan Kordoba, Maykon, Kaka, Kristian Karambö, Dieqo Milito, Mikael Silvestre yer almışdı. Nəhayət, Altıntopun komandasında isə bu sabiq türkiyəli ulduzlar - Volkan Dəmirəl, Tuncay Şanlı, Əmrə Belözoğlu, Nuri Şahin, Tümər Mətin, Arda Turan, Hakan Ünsal, Semih Şəntürk, Okan Buruk çıxış edirdi.

Futbolsevərlərin böyük maraq göstərdiyi və oyunları qadın hakim Neslihan Muratdağının idarə etdiyi turnirin finalına Kafu ilə Fiqunun komandaları yüksəldi. 4:4 hesabı ilə bitən finalda penaltilər seriyasında üstün olan Kafunun komandası turnirin qalibi oldu. Nestanın komandası turniri 3-cü, Altıntopun komandası isə 4-cü pillədə tamamladı.

Finalın ən dəyərli oyunçusu Kafunun komandasında çıxış edən Esteban Kambiasso seçildi.