“Beşiktaş” 10 ildən sonra Hatçinsonla vidalaşdı
Atiba Hatçinsonun “Beşiktaş” karyerası rəsmən başa çatdı.
"Football-plus.az" xəbər verir ki, məşqdən öncə bazada 40 yaşlı futbolçu üçün kiçik bir vida mərasimi keçirildi.
Bütün oyunçular, məşqçi korpusu, idarə heyətinin üzvü Əmrə Kocadağ və klubun işçiləri bir araya yığışaraq kanadalı futbolçu ilə vidalaşdı. Hatçinsonun göz yaşlarını saxlaya bilməməsi diqqəti çəkdi. Kanada futbolunun yetişdirdiyi ən önəmli isimlərdən olan Hatçinsonun vida sözləri belə oldu:
“Hər kəsə təşəkkür edirəm. İlk dəfə bu qapıdan içəri girdiyim vaxtdan artıq 10 il ötüb. Burda hər kəsdən özümə qarşı yalnız sevgi və hörmət gördüm. Burda hər kəs və hər şey buranı mənim üçün özəl bir yerə çevirdi. Həmişə özümü evdəki kimi hiss edirdim. Şenol Günəş də məni daim dəstəklədi. Buna görə də ona təşəkkür edirəm. 10 il ərzində yaşadıqlarım çox gözəl idi. Artıq vidalaşmaq zamanıdı. 3 çempionluq yaşadım. Məni irəli getməyə vadar edən, ruhlandıran komanda yoldaşlarım oldu. Meydanda hər zaman tərimin son damlasına qədər mübarizə apardım. Əmrə Kocadağa da mənə verdiyi dəstəyə görə minnətdaram”.
Qeyd edək ki, Hatçinson 2013-cü ilin yayında PSV-dən transfer olunmuşdu. 30 yaşı olmasına rəğmən o, ulduz statusunda gəlməmişdi və bu qədər uzun müddət klubda qalacağını az adam proqnozlaşdırardı. Amma təvazökarlığı, xarakteti, işinə ciddi yanaşması və komandaya verdiyi fayda ilə seçilən Hatçinson fanatların sevimlisinə çevrildi. 10 il ərzində “Beşiktaş”ın heyətində 334 rəsmi oyuna çıxaraq 27 qol, 37 məhsuldar ötürməlik (superliqada 270 oyun, 24 qol, 36 məhsuladr ötürməlik) performans sərgilədi. Bu müddət ərzində 3 çempionluq, 1 ölkə kuboku və 1 ölkə superkuboku olmaqla 5 titul qazandı. Ölkəsində 6 dəfə ilin ən yaxşı oyunçusu seçilən Hatçinson Kanada yığmasında 103 oyuna çıxaraq 9 qol vurdu. Onun “son rəqsi” də gözəl alındı. Hatçinson ötən tur “Kasımpaşa” ilə səfər oyununda penaltidən fərqlənməklə 40 yaş 115 günlüyündə superliqa tarixində qol vuran ən yaşlı əcnəbi futbolçu oldu.
Hatçinsonun “Beşiktaş”a və Türkiyəyə bağlılığını nəzərə alanda gələn mövsüm onun məşqçilər korpusuna daxil olması və ya akademiyada çalışması ehtimalı yüksəkdi. Hərçənd o, karyerasını bitirdiyini hələ rəsmi şəkildə açıqlamayıb.
Digər xəbərlər
