final
Mançester Siti – Mançester Yunayted 2:1
MS: Orteqa, Uoker (Lyaport, 90+5), Diaş, Akanci, Stounz, Rodri, B.Silva, Gündoğan, De Bruyne (Foden, 76), Qriliş (Ake, 89), Holann.
MY: De Xea, Van-Bissaka, Lindelöf (Maktominey, 83), Varan, Şou, Kazemiro, Fred, Fernandeş, Eriksen (Qarnaço, 62), Sanço (Veqhorst, 78), Reşford.
Qollar: Gündoğan, 1 (1:0). Fernandeş, 33-p. (1:1). Gündoğan, 51 (2:1).
Vərəqələr: Van-Bissaka, 45+4. Fred, 79. Orteqa, 81. Rodri, 90 – sarı.
Hakim: Pol Tirni (Lankaşir).
3 iyun. London. “Uembli” stadionu. 83179 tamaşaçı.

İngiltərə kubokunun finalındakı Mançester derbisi dünyadakı ən “yaşlı” titulu 7-ci dəfə qazanan “Siti”nin qələbəsi ilə bitdi. Hərçənd “şəhərlilər”in asan qələbə qazandığını demək olmaz. Gündoğan oyun başlayan kimi hesabı açdı və bundan dərhal sonra MS fərqi artıra bilərdi. Amma Rodri yaxşı imkanı boşa verdi. Ten Haqın yetirmələri tezliklə özünə gəldi. Əlbəttə, ərazi üstünlüyü Qvardiolanın komandasının tərəfindəydi, sadəcə, “Yunayted” cərimə meydançasına sıxılmamışdı. “Qırmızı şeytanlar” zaman-zaman irəli qaçırdılar. 33-cü dəqiqədə hesab bərabərləşdi. Qriliş əllə oynadığına görə “Siti”nin qapısına penalti təyin olundu və Fernandeş zərbəni dəqiq yerinə yetirdi. Nominal meydan sahibləri fasiləyə qədər təzyiqi artırdı, rəqibi müdafiə olunmağa məcbur etdi, ancaq təhlükəli vəziyyət yarada bilmədi. Yüksək pressinq, nəhayət, 2-ci hissənin əvvəlində nəticə verdi. Gündoğan cərimə meydançası xaricindən zərbə ilə dublunu rəsmiləşdirdi. Oyunun qalan dəqiqələri qarşılıqlı hücumlar şəraitində keçdi. Uzatma dəqiqələrində Orteqa qəhrəmancasına seyvlət etməklə Varanla Maktomineyin fərqlənməsinə imkan vermədi. Beləliklə, çempionluğun ardından ölkə kubokunu da qazanan “Siti” “trebl” yolunda daha bir addım atdı.

Faktlar
* “Siti” ölkə kubokunun finallar tarixinin ən erkən qolunu vurdu. Gündoğan hesabı açanda oyunun 13-cü saniyəsi gedirdi. İlkay 2009-cu ildə “Çelsi”nin qapısına 25-ci saniyədə yol tapan “Everton”un sabiq oyunçusu Lui Saanın rekordunu yenilədi.
* MS ölkə kubokunu 7-ci dəfə qazandı. “Şəhərlilər” bu uğura sonuncu dəfə 2019-da nail olmuşdu. Ölkə kubokunu ən çox qazanan komanda isə “Arsenal”dı (14). MY bu titula sonuncu dəfə 2016-da – Lui van Qalın dövründə yiyələnib.
* Qvardiola məşqçi karyerasında 34-cü titulu qazandı. O, “Barselona” ilə 14, “Bavariya” ilə 7 titul qazanıb. MS-də isə 6 il ərzində titullarının sayını 13-ə çatdırdı. Bunların sırasında 5 çempionluq, 4 Liqa kuboku, 2 İngiltərə Superkuboku və 2 ölkə kuboku var.
* MS ilyarım ərzində MY-yə yalnız bir dəfə uduzub. Bu klublar 2021-ci il noyabrın 6-dan bəri 5 dəfə qarşılaşıb. “Şəhərlilər” 4, MY 1 qələbə (bu il yanvarın 14-də) qazanıb.
* Qvardiola eyni ildə çempionluğu və ölkə kubokunu bir dəfədən artıq qazanan 3-cü məşqçidi. “Şəhərlilər”in baş məşqçisi 2018/19 mövsümündə də ikiqat uğur qazanıb. Peplə yanaşı, eyni mövsümdə həm kuboku, həm də çempionluğu birdən çox qazanan iki məşqçi var – Arsen Venger (Arsenal, 1997/98, 2001/02), Aleks Ferqyuson (MY, 1993/94, 1995/96, 1998/99).
* Qvardiola “böyük beşlik” ölkələrində 11 kubok finalından 10-nu qazanıb. Onun uduzduğu yeganə final 2010/11 mövsümünə aiddi. Onda Pepin “Barselona”sı ölkə kubokunun finalında Mourinyonun “Real”ına uduzub (0:1, əlavə vaxtda).