2022/23 mövsümünü “Qəbələ” üçün uğurlu saymaq olar. “Qırmızı-qaralar” Konfrans Liqasına vəsiqə qazandı.

Ötən şənbə isə ölkə kubokunun qalibi oldu. Başqa klublarda uğuru həm baş məşqçinin, həm də komandanın və ya rəhbərliyin adına yazmaq olar. “Qəbələ” isə bu nəticələri kollektiv olaraq əldə etdi. Lakin arxa planda olan Nail Kərimov inkişafın memarlarından biridi. O, çətin anlarda “qırmızı-qaralar”ı tərk etmədi. İşinə köklənərək “radarlar”ın bu nöqtəyə gəlməsində rol oynadı. Kubokun qalibi olmalarına görə ən çox sevinənlərdən biri də məhz o idi.

"Football-plus.az" olaraq bu məqamı nəzərə alıb klub rəsmisi ilə söhbətləşdik.

- 2022/23 mövsümü “Qəbələ” üçün uğurlu oldu. Komanda Konfrans Liqasına vəsiqə qazandı, ölkə kubokunun qalibi oldu. Klub rəsmisi kimi cari “futbol ili”ni dəyərləndirməyinizi istərdik...
- Kuboku qazanmağımız xüsusi hadisədi. Buna görə komandaya təşəkkürümü bildirirəm. Klub olaraq, əlimizdən gələn hər şeyi etmişdik. Xüsusi hazırlıq görmüşdük ki, komanda meydanda əzmkar mübarizə aparsın. Bu gün də kollektivdən istidəyimiz oyunu gördük. Meydanın hər qarışı uğurdan mübarizə apardılar. Çünki bilirdik ki, ancaq belə əzmkarlıqla qalib gələ bilərik. İstəməsən, inanmasan, qələbə qazanmaq mümkün deyil. Klub rəhbərindən tutmuş, adi əməkdaşa qədər hamımız qalib gələcəyimizə inanırdıq. Bu səbəbdən də Azərbaycan kubokunun qalibi olduq. Mövsümü major notda başa vurduq. Düşünürəm ki, bütün bunları nəzərə alaraq cari “futbol ili”nin “Qəbələ” üçün uğurlu olduğunu söyləyə bilərik.

- “Qəbələ” addım-addım əvvəlki əzəmətini qaytarır. Növbəti hədəf Konfrans Liqasının qrup mərhələsinə vəsiqə qazanmaqdı?
- Bütün işlərdə ənənə ən vacib məsələdi. Biz də klubumuzda bunu yarada bilmişik. Enişlər, yüksəlişlər həmişə olur. Bu, ancaq maddi vəziyyətlə bağlı deyil. Bəzən elə olur ki, imkan yaxşı olanda da uğursuzluqla üzləşirsən. Ardıcıl iki il boyumuzdan yuxarı tullanmışıq. Bunu bacarmışıqsa, deməli, qarşımıza növbəti hədəflərin qoyulmasının vaxtıdı. Rəhbərlik əlindən gələn hər şeyi edir ki, əzəmətimizi qaytaraq.

- Komanda uğurlu nəticələr əldə edəndə rəhbərliyin işi bir qədər də çətinləşir. Sabitlik üçün heyəti qorumaq əsas məsələlərdən biridi. Bu, “Qəbələ” üçün çətin olmayacaq?
- Əsas məqsədimiz budu. Amma bəribaşdan deyə bilərəm ki, bütün komandanı qorumaq mümkün olmayacaq. Artıq bəzi futbolçuların kollektivi tərk edəcəyini bilirik. Onları layiqincə əvəz edəcək futbolçuların axtarışındayıq. Düşünürəm ki, bunu bacaracağıq. Növbəti mövsümdən daha yaxşı nəticələr əldə edəcəyimizə inanıram. Detallar barədə indi nəsə deyə bilmərəm. Çünki son həftə əsas fikrimiz ölkə kubokunun finalı idi. Konkret bu görüşə köklənmişdik. Bazar günündən etibarən Konfrans Liqasının oyunları və heyətlə bağlı planlara başlamışıq.

- “Qəbələ”nin uğurlu çıxışının əsas memarı, təbii ki, baş məşqçi Elmar Baxşıyevdi. Onunla yola davam edəcəksiz?
- Elmar müəllimlə uzun müddət əvvəl şifahi razılıq əldə etmişdik. Yenə deyirəm, ötən həftə heç kimə dəymədik. Çünki hamının fikri kubokun finalında idi. Artıq digər məsələlər haqda düşünməyə başlamışıq.

- Konfrans Liqasında iştirak etmək üçün üç stadion sifariş vermisiz. Bunlar Qəbələ şəhər stadionu, “Dalğa Arena” və “Bakcell Arena”dadı. Komanda avrokuboklarda mübarizəyə hansı stadionda başlayacaq?
- Qəbələdəki arena ilk iki mərhələ üçün yararlıdı. Bu səbəbdən də ilk oyunumuzu burda keçirəcəyik. Yolumuza davam etsək, “Dalğa Arena”da oynayacağıq. Qrup mərhələsi üçün isə bizim üçün doğmalaşan “Bakcell Arena”nı sifariş etmişik.

İLKİN SULTANLI