Bu yay avrokuboklara yollanacaq qatarın sonuncu sərnişini “Qəbələ” oldu.

“Qırmızı-qaralar” mövsümboyu sabit və baxımlı oyunu ilə futbol ictimaiyyətinin rəğbətini qazandı. Bölgə təmsilçisi məqəsədə çatsa da, şənbə günü Elmar Baxşıyevin komandasını 2022/23 “futbol ili”ndə daha bir həlledici qarşılaşma gözləyir. “Neftçi” ilə keçiriləcək ölkə kubokunun finalı ərəfəsində “qırmızı-qaralar”ın baş meneceri Nail Kərimovla söhbətləşdik. Klub rəsmisi premyer-liqadakı çıxışı dəyərləndirdi, transfer məsələsinə toxundu, ictimaiyyət arasında gəzən bəzi söhbətlərə münasibət bildirdi.

- Düzdü, qarşıda sizi daha bir oyun – ölkə kubokunun həlledici matçı gözləyir. Buna baxmayaraq, mövsümü dəyərləndirməyinizi istərdik.
- Finalın nəticəsindən asılı olmayaraq, geridə qalan mövsümü bizim üçün uğurlu saymaq olar. İstər komandanın sərgilədiyi oyun, istər kollektivə qoşulan yeni futbolçuların performansı, istərsə də başqa sahələrdəki iş və nəticələr baxımından “futbol ili”ni müsbət dəyərləndirə bilərik. Həm əsas komandamız, həm də akademiyamız qarşıya qoyulan vəzifəni, demək olar, yerinə yetirdi. Təbii ki, kuboku da qazanmaq istəyirik. Bunu da bacarsaq, lap yaxşı olar.

- Rəhbərliyi geridə qoyduğumuz mövsümdə ən çox narahat edən nə oldu?
- Təbii ki, belə məsələlər, çətinliklər də az olmadı. Amma bunun olması normaldı. Hamıya məlumdu ki, çempionatın əvvəlində maliyyə sarıdan sıxıntımız var idi. Bu hələ də davam edir. Ancaq çalışırıq necəsə yoluna qoyaq. Yeni sponsorlarımızın olduğunu da vurğulamaq lazımdı. İşin futbol tərəfi ilə yanaşı, marketinq sahəsində də təqdirəlayiq addımlar atıldı və atılmaqda da davam edəcək.

- Komandanın uğurlu çıxışı futbolçularınıza marağı artırıb. Əldə etdiyimiz məlumata görə, bir çox oyunçularınız – həm yerlilər, həm də legionerlər - premyer-liqanın digər təmsilçilərinin maraq dairəsinə düşüb. Hazırkı heyəti qoruya biləcəksiz?
- Komanda yaxşı oynayırsa, boyundan yuxarı tullanmağı bacarırsa, futbolçulara təkliflərin olmasını normal qarşılaşmaq lazımdı. Rəsmi olmasa da, bilirik ki, bəzi klubların yaxşı büdcəsi var. Növbəti mövsüm üçün oyunçularımıza daha sərfəli müqavilə şərtləri təklif olunur. Əlbəttə, bu heyəti qorumaq bizim üçün çətin olacaq. Buna baxmayaraq, əlimizdən gələni edirik. Buna nə dərəcədə nail ola biləcəyimizi isə zaman göstərəcək.

- Heç şübhəsiz, komandanı tərk edənlərlə yanaşı, yeni qoşulanlar da olacaq. Transfer çalışmaları baxımından nə yenilik var və ya gözlənilir?
- Yeni oyunçulara baxırıq. Danışıqlar gedir, müzakirə aparırıq. Kiminləsə anlaşsaq, ictimaiyyətə bu barədə məlumat veriləcək. Hələ ki bu yöndə konkret danışıq apardığımız, ortaq məxrəcə gəldiyimiz futbolçu yoxdu.

- İki gündən sonra ölkə kubokunun finalında “Neftçi” ilə oyununuz var. Qarşılaşmanın “Bakcell Arena”da keçiriləcəyini nəzərə alsaq, “ağ-qaralar” dəstək baxımından sizdən bir addım öndədi. Həlledici görüşə qəbələli azarkeşlərin marağı necədi, komanda azarkeşinə güvənə bilər?
- Qəbələli azarkeşlərin də final görüşünə marağı böyükdü. Azarkeş kütləsinin əsas hissəsi Qəbələdədi. Ordan bura gəlişin asan olmadığını nəzərə alsaq, dəstək üçün minlərlə azarkeşimizin Bakıya gələcəyini söyləmək düzgün olmaz. Fikrimcə, bizə ayrılan yerin dolacağına ümid edə bilərik.

- Son günlər klubun fəxri prezidenti Tale Heydərovun yenidən “Qəbələ”yə böyük maliyyə ayıracağı ilə bağlı söz-söhbət dolaşır. Söylənilənlərə inansaq, komandanın uğurlu çıxışı Tale bəyi yenidən futbola dönməyə sövq edib. Mümkünsə, bu məsələyə münasibət bildirərdiz.
- Bu sualı şərh etmək, münasibət bildirmək istəmirəm. Belə bir şey yoxdu, müzakirə olunmayıb. Bunlar şayiədən başqa bir şey deyil.

- Komandanın baş məşqçisi Elmar Baxşıyevlə də bağlı xəbərlər yayılır. Bəzi mətbu orqanlarda onun yeni mövsümdə “Neftçi”nin “sükanı arxasında” olacağı yazılır...
- Elmar müəllimlə birlikdə növbəti mövsümün planlarını qururuq, seçimlərimizi edirik. Mətbuatda adı hansısa klubla yanaşı hallana bilər. Ancaq bizə baş məşqçimizlə bağlı nə rəsmi, nə də şifahi müraciət olub. Odu ki, bunu da növbəti şayiə saya bilərik.

RƏŞAD