Almaniyada futbol mövsümünə şənbə günü “Olimpiyaştadion”da yekun vuruldu. Adəti üzrə bu nəhəng idman qurğusu ölkə kubokunun finalına evsahibliyi etdi.

"Football-plus.az" xəbər verir ki, həlledici görüşdə kubokun son qalibi “Leyptsiq”lə bu turniri sonuncu dəfə 2018-də qazanmış “Ayntraxt” üz-üzə gəldi.

Finalda baxımlılıq az olsa da, gərginlik hiss olunurdu. İlk yarıda nominal meydan sahiblərində Verner, qonaqlarda isə Kolo Muani fərqlənməyə yaxın oldu. Amma birinciyə qapıçı, ikinciyə qeyri-dəqiqlik mane oldu. Şansları o qədər də yüksək qiymətləndirilməyən Frankfurt təmsilçisi 2-ci hissənin ortalarına qədər rəqibə yaxşı müqavimət göstərsə də, davamı gəlmədi. Faktiki ilk qol görüşdə həlledici oldu. Bu mövsüm uzun müddət zədədən əziyyət çəkən, amma qayıdandan sonra yenə qolları sıralayan Nkunku “öküzlər”in heyətində keçirdiyi son rəsmi oyunda əla performans sərgilədi.

Fransalı vingerin klubu tərk edəcəyi dəqiqdi. 71-ci dəqiqədə “Ayntraxt” əks-hücuma çıxmaq istəyərkən top itirildi və eyni tərzdə hücum quran “Leyptsiq” hesabı açdı. Müdafiəçilərin əhatəsində olmasına baxmayaraq, Nkunku zərbə üçün imkan tapdı. Rəqib oyunçuya dəyərək istiqamətini dəyişən top tora daxil oldu. Sona qədər də şokdan ayılmayan “Ayntraxt” son anlarda daha bir top buraxdı. Nkunku bu dəfə assistent rolunda çıxış etdi və Soboslai yekun nəticəni müəyyənləşdirdi. Oliver Qlasner frankfurtlularla titul qazanaraq vidalaşa bilmədi. Amma onun dönəmini istənilən halda uğurlu saymaq olar. Çünki komanda həm AL-i qazandı, həm də tarixində ilk dəfə ÇL-in qrupunda oynayaraq pley-offa çıxdı. Beləliklə,

“Leyptsiq” ardıcıl 2-ci dəfə ölkə kubokuna sahib çıxdı. Bu, 2009-cu ildə yaradılan klubun tarixindəki yeganə titullardı. “Leyptsiq” həm də 80 illik tarixə malik ölkə kubokunu ardıcıl 2 il qazanan cəmi 8-ci kollektiv oldu. Maraqlıdı ki, bu klublar arasında Dortmund “Borussiya”sı yoxdu. Xatırladaq ki, Marko Roze bu vəzifəyə sentyabrın ortalarında – Domeniko Tedeskonun istefasından sonra gətirilmişdi. Həmin vaxt komanda bundesliqada 11-ci pillədə idi. Rozenin dönəmində 41 rəsmi oyunun 28-də qalib gələn “Leyptsiq” bundesliqada 3-cü yeri tutmaqla yanaşı ölkə kubokunu da qazandı. Yeni mövsümə avqustun 12-də artıq klassikaya çevrilən “Leyptsiq”lə “Bavariya” arasındakı superkubok uğrunda matçla start veriləcək. Ötən yay da mövsüm məhz bu komandaların superkubokdakı oyunu ilə start götürmüşdü. Həmin vaxt “Bavariya” 5:3 hesabı ilə qalib gəlmişdi.

final
Leyptsiq – Ayntraxt F 2:0
Leyptsiq: Blasvix, Henrixs, Klostermann, Orban, Halstenberq, Olmo, Laymer, Aydara (Şlager, 77), Soboslai, Nkunku, Verner (Poulsen, 61).
Ayntraxt F: Trapp, Tuta, Hasebe (Borre, 78), Ndika, Buta, Rode (Lindström, 70), Sou, Maks (Lents, 78), Kamada, Götse, Kolo Muani.
Qollar: Nkunku, 71 (1:0). Soboslai, 85 (2:0).
Vərəqələr: Götse, 77. Laymer, 81. Nkunku, 90+1. Kolo Muani, 90+2 – sarı.
Hakim: Daniel Zibert (Berlin).
3 iyun. Berlin. “Olimştadion” stadionu. 74322 tamaşaçı.