Mayın 11-də Avropa Liqasının (AL) yarımfinalına start verildi. İtaliyada keçirilən ilk oyunlardan biri ev sahiblərinin qələbəsi ilə, digəri isə heç-heçə nəticələndi.

"Football-plus.az" xəbər verir ki, “Sevilya” və “Roma” ayın 18-nə təyin olunan cavab görüşünə müəyyən üstünlüklə çıxacaq.

yarımfinal, ilk oyunlar
Yuventus - Sevilya 1:1
Qatti, 90+7 - Ən-Nəsiri, 26.

Yuventus (İtaliya): Şçensnı, Kuadrado, Danilo, Bonuççi (Qatti, 62), Aleks Sandro, Lokatelli, Kostiç (Aylinq, 46), Miretti (Kyeza, 46), Rabyo, Di Mariya (Poqba, 70), Vlahoviç (Milik, 61).

Sevilya (İspaniya): Bunu, Akunya, Bade, Navas, Qudel, Fernando, Okampos (Montyel, 34), Rakitiç, Torres (A.Qomes, 73), Xil (Lamela, 81), Ən-Nəsiri.

22-ci dəfə qitə kuboklarının yarımfinalında oynayan və bu göstəriciyə əsasən “Real” (37), “Bavariya” (28) və “Barselona”dan (26) geri qalan “Yuventus”un finala çıxmasının asan olmayacağı aydın məsələ idi. Zarafat deyil, əvvəlki mərhələdə “Mançester Yunayted”i mübarizədən kənarlaşdıran “Sevilya” AL-in son 10 mövsümündə 5-ci dəfə yarımfinala çıxmış və bu müddətdə turnirdə 4 dəfə çempion olmuşdu. Komandaların avrokuboklardakı əvvəlki qarşılaşmalarında üstünlük İtaliya klubunun tərəfində idi:

“Yuventus” Çempionlar Liqasının (ÇL) qrup turnirlərində pireneylilərə iki dəfə qalib gəlmiş və bir oyunda uduzmuşdu. Amma “qoca sinyora”nın qitə arenasında İspaniya komandalarına evdəki son iki matçda uduzduğunu (“Barselona”ya 0:2, “Vilyarreal”a 0:3) da xatırladaq. “Sevilya” Turinə hər iki səfərində qol vura bilməmişdi.

Əndəlüslər bu seriyanı cümə axşamı qırdılar. Qonaq komanda ilk hissədə çox yaxşı təsir bağışladı. Şçensnı Okamposun iki təhlükəli zərbəsini dəf etməsəydi, matçın nəticəsi böyük ölçüdə fasiləyə qədər məlum ola bilərdi. Doğrudu, Vlahoviçin də bir dəqiqə ərzində iki dəfə Bununun qoruduğu qapıya yol tapmaq şansı oldu. Amma ilk yarıda hesabı yalnız Ən-Nəsiri dəyişə bildi. Mərakeşli hücumçunun 26-cı dəqiqədə Okamposun ötürməsini dəyərləndirməsi oyunun məntiqi axarına uyğun idi.

Fasilədən sonra Kyeza ilə Aylinqi mübarizəyə qoşan Massimiliano Alleqri komandasının oyununa canlanma gətirməyi bacardı. “Yuventus”un təşəbbüsə yiyələnməsi qonaqları müdafiəyə daha böyük qüvvə ilə çəkilməyə məcbur etdi. Sevilyalılar uzun müdddət inamla müdafiə olunsalar da, son anda böyük təzyiqə tab gətirə bilmədilər. Əsas vaxta əlavə olunan 7-ci dəqiqədə künc zərbəsindən sonra Poqbanın ötürməsinə reaksiya verən müdafiəçi Qatti ev sahiblərini məğlubiyyətdən qurtardı. Qələbəni finişdə əldən verən “Sevilya” istənilən halda evə qənaətbəxş nəticə ilə yollandı.

Roma - Bayer-04 1:0
Bove, 63.

Roma (İtaliya): Patrisio, Çəlik, Mançini, Kristante, İbanyes, Spinatsola, Matiç, Bove (Viynaldum, 76), Pelleqrini, Belotti (Dibala, 76), Abraham.

Bayer-04 (Almaniya): Qradetski, Frimponq, Tapsoba, Kossunu (Bakker, 36), Ta, İnkapye, Palasios, Andrix (Amiri, 90+2), Diabi (Adli, 72), Virts, Qlojek (Azmun, 72).

Şagird müəlliminə qarşı – “Roma”nın yarımfinalda “Bayer-04”ə rəqib olması ilk növbədə bu fikri ağla gətirir. Məsələ ondadı ki, Almaniya klubunun 41 yaşlı çalışdırıcısı Xabi Alonso 2010-13-cü illərdə “Real”da Joze Mourinyonun rəhbərliyi altında oynayıb. Onların 10 ildən sonra AL-in finaldan əvvəlki mərhələsində qarşılaşması müəllimin, yoxsa şagirdin qələbəsi ilə nəticələnəcəyi sualını labüd edib.

Maraq üçün qeyd edək ki, Mourinyo avrokubokların bu mərhələsində 12-ci sınağını verir və o, indiyədək 5 dəfə müxtəlif turnirlərin qalibi olub. Tanış simaların ilk duelindən əvvəl “Roma” və “Bayer-04” arasında qitə arenasındakı rəqabətdə bərabərlik vardı: ÇL-in qrup mərhələsindəki oyunlarda hərəyə bir qələbə qazanan tərəflər iki dəfə “sülh”ə razılaşmışdılar.

Meydana ciddi itkilərlə çıxan “Roma” böyük dəstək aldığı azarkeşlərini qələbə ilə sevindirməyi bacardı. Amma leverkuzenlilər oyun planında rəqibdən geri qalmadılar, hətta bəzi epizodlarda romalıları üstələyirdilər. Fərq onda oldu ki, 63-cü dəqiqəyə təsadüf edən epizodda Bove hesabı açdı. Amma 20 yaşlı yarımmüdafiəçinin qol vurmasında Abrahamın böyük rolu olduğunu qeyd etməliyik.

Qonaqların ən yaddaqalan şansını Frimponqun boş qapıya yönələn zərbəsinə reaksiya verən Kristante heçə endirdi. Matçda gərginlik və intriqa sona qədər mövcud oldu. Amma Patrisionun qapısına yol tapa bilməyən “Bayer-04” Almaniyaya məğlub qayıtdı. Yeri gəlmişkən, portuqaliyalı qapıçı AL-də 67-ci oyununu keçirdi. 35 yaşlı futbolçu turnirin bu adla təşkil edildiyi 2009/10 mövsümündən indiyədək rekord sayda matça çıxıb. Ruyun “ikinci dərəcəli” qitə kubokunda “Vulverhempton” və “Sportinq”in qapısını qoruduğunu da xatırladaq. Amma onu və komandasını Leverkuzendə asan sınaq gözləməyəcək.

Hər halda, romalılar finala vəsiqə qazanmaq üçün daha çox tər tökməli olacaqlar.

Bombardirlər: Bonifas (Yunion), Reşford (Mançester Yunayted) – 6, S.Ximenes (Feyenoord) - 5.