Mövsüm başa çatan kimi Azərbaycan futbolunu avrokuboklarda təmsil edəcək klubların şanslarının dəyərləndirilməsi təbii haldı. Yenə də böyük ümidlərlə yayı gözləyirik. Arzulayırıq ki, “Qarabağ”ın uzun illərdən bəri açdığı cığırı başqaları da davam etdirsin, qrup mərhələsindəki təmsilçilərimizin sayı artsın. Bəs bu arzu nə dərəcədə realdı?

Avropanın yaşıl meydanlarında bizi təmsil edən 4 klubdan biri də “Neftçi” olacaq. Ölkənin ən qocaman klubu beynəlxalq arenada artıq bir dəfə ilk imza atıb. 2012-ci ildə rəhmətlik Böyükağa Hacıyevin çalışdırdığı “Neftçi” Avropa Liqasının qrup mərhələsinə yüksəlməklə tarixi uğura imza atmışdı. Bununla da “ağ-qaralar” ölkə klubları arasında qitəmiqyaslı kubokların qrup mərhələsinə yüksələn ilk klub olmaqla cığıraçan rolunu oynamışdı. Təəssüf ki, “Neftçi” indi o günlərin xiffətini çəkir. Həm tarix, həm də səviyyə baxımından o möhtəşəm günlər, başgicəlləndirici uğurlar uzaqdadı. Ondan sonrakı mövsümlərdə “Neftçi” bu uğuru təkrarlamağı bacarmayıb. Klub rəhbərliyi iddia edir, azarkeşlər inanırdı ki, “ağ-qaralar” çempion olsa və mübarizəyə Çempionlar Liqasından başlasa, uğur qazanmaq da asanlaşacaq.

Belə düşünənlərin fikrinə görə, Çempionlar Liqasına qatılan “ağ-qaralar” ən azı Konfrans Liqasının qrup mərhələsinə düşməyi bacaracaq. Amma bu ümidlər də doğrulmadı. “Neftçi” Çempionlar Liqasından mübarizəyə başlayıb, Konfrans Liqasında Avropa ilə vidalaşdı. “Olimpiakos”a “ilişəndən” sonra nə Avropa Liqasında, nə də Konfrans Liqasında mərhələ keçmək mümkün oldu.

İndi həmin ümidlər yenidən cücərir. Ölkə çempionatında bürünc medal qazanan “Neftçi” kubokda da finala çıxıb. Həlledici görüşün nəticəsindən asılı olmayaraq, “ağ-qaralar” Azərbaycan futbolunu Konfrans Liqasında təmsil edəcək. Bəs bu təmsilçilik nə dərəcədə uğurlu olacaq? “Ağ-qaralar”ın qitə kuboklarındakı mübarizə yolu hara qədər uzanacaq? Razılaşaq ki, bunu təxmin etmək çox çətindi. Ən azı ona görə ki, “Neftçi”nin adı ətrafında xeyli cavabsız suallar var. Bu sualların cavabı tapılmadan komandanın Konfrans Liqasına hansı səviyyədə yollanacağı, məsul yarışa necə hazırlaşacağı qeyri-müəyyəndi. Rumıniyalı mütəxəssis Laurentsiu Regekampf hər nə qədər soyuqqanlı görünməyə çalışsa da, “Neftçi”dəki gələcəyinin qeyri-müəyyən olduğu heç kimə sirr deyil. Paytaxt təmsilçisi final görüşündən qalib ayrıla bilməsə, çətin ki, klubun Müşahidə Şurası yola onunla davam etmək istəyəcək. Şəxsən mənim üçün Regekampfın finaldakı mümkün məğlubiyyətdən sonra Rumıniyaya yollanması və bir daha Bakıya dönməməsi təəccüblü olmaz.

Rumıniyalı mütəxəssisin gələcəyi barədə qərar veriləndən sonra “Neftçi”nin avrokubok perspektivi barədə daha inamlı danışmaq, təxminlər irəli sürmək mümkündü. Çünki yeni baş məşqçinin gəlişi ilə heyətdə böyük dəyişikliklərin olacağı da şübhə doğurmur. Bu isə hər şeyin sıfırdan başlanması deməkdi. Yaxşı yadımızdadı ki, ötən mövsüm Regekampf avrokuboklardakı uğursuzluğu hazırlıq üçün vaxtın az olmasına bağlamışdı. Özü də çoxbilmiş rumın bu yaxınlarda verdiyi müsahibədə yenidən həmin məqamı xatırlatmış, yeni mövsüm barədə daha inamlı görünməyə çalışmışdı. Deməli, onun əvəzləyicisi üçün bu “kozır” da keçərli olacaq. Bəli, sabitlik hər bir komanda üçün yaxşı haldı. Uzun müddət bir komandada çalışan mütəxəssisin uğur qazanmaq şansı daha çoxdu. Amma burda da şübhə doğuran məqam Regekampfın “Neftçi” üçün nə dərəcədə uğurlu məşqçi olmasıdı. Mövsüm ərzində onun xüsusi bacarığına, komandaya yeni ruh verməsinə, hansısa oyunu məşqçi bacarığı sayəsində qazandığına şahidlik etmədik.

Baş məşqçinin kimliyi qədər vacib olan digər sual kapitan Emin Mahmudovun “Neftçi”dəki gələcəyidi. İstedadlı futbolçu bu mövsüm səviyyəsini ortaya qoymağı bacarıb, “Neftçi”nin xilaskarı rolunda çıxış edib. Onun vurduğu vacib qollar “ağ-qaralar”ın qazandığı uğurlarda böyük pay sahibidi. Onun gedişi ilə “Neftçi” təkcə liderini yox, xilaskarını da itirmiş olacaq. Çətin ki, Eminin gedişiylə yaranan boşluğu tezliklə doldurmaq mümkün olsun. Mahmudovun bitməkdə olan müqaviləsinin müddətini uzatmağa tələsməməsi, tərəddüd içində olması şübhələri daha da artırır. Görünən odu ki, kapitan komandanı tərk etməyə meyillidi. Ya Çempionlar Liqasında oynamaq, ya da daha çox qazanmaq həvəsi Emini “Neftçi”dən” ayıra bilər...

Göründüyü kimi, “Neftçi”ylə bağlı yetərincə cavabsız suallar var. Klub rəhbərliyi əvvəlcə bu suallara cavab tapmalıdı. Sonrası isə elə sonranın işidi.

AMAL