Misli premyer-liqasında son tura yekun vurulur.

“Football-plus.az” xəbər verir ki, “Neftçi” “Sabah”ı qəbul edib - 1:0. Oyundan sonra qonaqların çalışdırıcısı Murad Musayevin mətbuat konfransı keçirilib. O, jurnalistlərin suallarını cavablandırıb:

- Hazırkı kollektivin neçə faizi qalacaq, kimlər komandanı tərk edəcək?
- Çətin sualdı. Bəzi mövqelər var ki, ordakı oyunçularla müqavilə müddətini uzatmamışıq. Gözləyirəm ki, beş transfer həyata keçirəcəyik.

- Abdulaye Ba avrokuboklarda və yeni mövsümdə "Sabah"a kömək olacaq?
- Bəzi futbolçularla müqavilə müddəti bitib. "Neftçi" ilə oyundan öncə əvvəl sözləşmələri bitən heç bir futbolçu ilə danışmamışıq. Düzgün olmazdı ki, oyunçulardan əvvəl sizə məlumat verək.

- Yəqin ki, sizin də istirahətə ehtiyacınız var. Planlarınız necədi?
- Sabah Krasnodara uçacam. Bir həftəyə yaxın dənizə gedəcəm, evdə olacam. İyunun 21-də artıq qayıdacağıq və təlim-məşq toplanışına başlayacağıq.

- Toplanışla bağlı planlarınız necədi? Avstriyada keçəcəksiz toplanışı?
- Bəli, müəyyənləşdirmişik. Hazırlığı Qəbələdə və ya Bakıda keçəcəyik. Oyunçular bizə qoşulana qədər kiçik heyətlə olacağıq. Onlar gəldikdən sonra Avstriyaya yollanıb, toplanışı orda keçəcəyik.

- Aleksey Kaşukla bağlı məsələdə yenilik var?
- Heç nə dəyişməyib. "Şaxtyor"a qayıdır.

- Mövsüm ərzində hakimlər və jurnalistlərlə aqressiv olursuz. Səbəbi nədədi?
- Sizdə həmişə neqativ suallar olur. Deyirsiz avrokuboklarda Yusiflə, Bəxtiyarla nə edəcəksiz? Avrokuboklarda oynayanda da bu cür suallar verəcəksiz? Sanki siz jurnalistlər arasında dünya çempionuz. Keçən dəfə burda belə sual verirlər ki, komandanı neçə faiz gücləndirmək istəyirsiz? Buna necə cavab verim? Zarafatla dedim ki, təbii ki, Modriçi, Benzemanı istəyirəm. Çox suallar verilir. Öz futbolçularım haqda heç vaxt pis danışmayacam. Amma provakasiya uyğun suallar verirsiz. Çox sağolun. Sizin bu suallarınız üçün darıxacam(gülür).