Ponomaryov: “Kaşuk məsələsində dalana dirənməyimiz pulla bağlı deyil”
Premyer-liqada gümüş medalları təmin edən "Sabah" aparıcı oyunçusu Aleksey Kaşuku komandada saxlamaq cəhdlərində son nöqtəni qoya bilməyib. Müqavilə ilə “Şaxtyor”a məxsus olan istedadlı yarımmüdafiəçinin məsələsi pula görə həllini tapmayıb. Deyilənə görə, “Sabah”ın 1 milyon avro təklifiylə razılaşmayan Ukrayna təmsilçisi daha artığını tələb edir.
"Football-plus.az" olaraq bununla bağlı “Sabah”ın Müşahidə Şurasının üzvü, idman direktoru İqor Ponomaryovla danışdıq:
“Kaşuk məsələsində dalana dirənməyimiz pulla bağlı deyil. Futbolçu müqavilə ilə "Şaxtyor"a məxsusdu. Ukrayna nəhəngi də onu heyətinə qaytarmaqda maraqlıdı. Biz Kaşuku komandada saxlamağı çox istəyirik. Amma hələ ki bu yöndə müsbət nəticə əldə edə bilməmişik. Cəhdlərimizi davam etdirəcəyik”.
Təcrübəli mütəxəssis "Sabah"ın əsas heyətini qorumaqla yanaşı, güclənməsinin vacibliyini də söylədi:
"Heyətimizin özəyini qoruyacağıq. Bununla yanaşı, yeni futbolçularla da güclənməliyik. Bu yöndə ciddi işlər gedir. Komandamızı avrokuboka hazırlayacağıq".
Yığmanın sabiq baş məşqçisi "Bank Respublika Arena"da davam edən yenidənqurma, təmir işlərinə də toxundu:
"Stadionumuzda bir neçə aydı təmir gedir. Əlavə “skay-boks” otaqları tikirik, yeni tablonun quraşdırılması, işıqlandırma sisteminin yenilənməsi və başqa işlər gedir. Buna rəğmən, hələ görüləsi iş çoxdu. Çempionat hələ davam edir. UEFA-dan nümayəndənin gəlib stadiona baxış keçirməsinin tarixi dəqiqləşməyib. Amma təmir bitəndən sonra UEFA-nın müvafiq qurumuna standartlara cavab verməyimizlə bağlı sorğu göndərəcəyik".
ABDULLA İSMAYILOĞLU
Digər xəbərlər
