Premyer-liqanın cari mövsümündə parlayan futbolçulardan biri də "Sabah"ın vingeri Aleksey Kaşukdu. Ukraynalı komandasının 2-ci yerin sahibi kimi Konfrans Liqasına vəsiqəni təmin etməsində əsas pay sahiblərindən biri oldu. Sərgilədiyi mükəmməl oyunla bir çox klubun maraq dairəsində olan yarımmüdafiəçinin CV-sinə baxmaq yerinə düşər.

Aleksey Kaşuk 2000-ci il iyunun 29-da Ukraynanın keçmiş Novoqrad-Volınski, hazırda Zvyagel adlanan şəhərində dünyaya göz açıb. Futbolda ilk addımlarını "Vorskla"nın uşaq komandasında atıb. 2013-16-cı illərdə bu klubun aşağı yaş qruplarında oynayıb. 2016-da "Şaxtyor"un akademiyasını bitirib. "Şaxtaçılar"ın U-17, U-19 və əvəzedicilərində oynasa da, əsas komandasında debüt edə bilməyib və onu "Mariupol"a icarəyə veriblər. Adı çəkilən komandada 2019-22-ci illər ərzində 48 rəsmi oyun (4-ü kubok) keçirməklə 8 dəfə rəqib qapılarına yol tapıb. Ötən mövsümün ikinci yarısında "Sabah"a icarəyə verilən ukraynalı 8 oyunda, 634 dəqiqə meydanda olmaqla 2 qol vurub. Kaşuk cari mövsümə zədə səbəbindən gec qoşuldu. O, 6-cı turdan meydana çıxmağa başladı. Geridə qalan 29 oyunda şans qazanan futbolçu 2292 dəqiqə meydanda olmaqla 16 dəfə rəqib qapıçıları məyus edib, Həmçinin 10 məhsuldar ötürmə müəllifidi. O, "Sabah"da Coy-Lens Mikelsdən sonra 2-ci, premyer-liqanın isə 5 bombardirindən biridi.

Kaşukun klub karyerasında böyük uğuru və göstəriciləri "Sabah"la bağlıdı. O, Masazır təmsilçisində həm keçirdiyi matç sayına, həm vurduğu qollara, həm də premyer-liqasının gümüş medalını qazandığına görə fərqlənir. "Bayquşlar"la yola davam etsə, Konfrans Liqasında da mübarizə aparacaq. İndiyə kimi cəmi 1 dəfə "Mariupol"un heyətində avrokubok həyəcanı yaşayıb ki, bu da 7 dəqiqəyə bərabər olub.

Ukraynanın U-17, U-19, U-20 və U-21 yığmalarında da oynayıb. "Sabah"ın vingeri U-20 yığmalarının 2019-cu ildə Polşada keçirilən dünya çempionatında iştirak etməklə komandasının çempionluğunda rol oynayıb. Buna görə Kaşuk ölkənin 3-cü dərəcəli "Xidmətlərinə görə" ordeniylə də təltif olunub. Hazırda “transfermarkt”da qiyməti 700 min avro qiymətləndirilsə də, təbii ki, gerçək məbləğ bundan yüksəkdi.

Bilindiyi kimi, "Sabah" onu heyətində saxlamağa çalışır. "Şaxtyot" da yetirməsini qaytarmağı düşünür. Bundan başqa, Kaşukun xidmətində bir neçə klub maraqlıdı. Hətta iddialara görə, ona İtaliya A seriyasından da təkliflər var. Masazır təmsilçisinin onun xidmətində maraqlı olduğunu baş məşqçi Murad Musayev dəfərlə açıqlayıb. Hətta deyilənə görə, Kaşuka görə “Şaxtyor”a 1 milyon avro təklif olunsa da də, klub 1,5 milyon istəyib. Qısası, "Sabah" onu komandada saxlamaq üçün çox “tərləməlidi”. Razılığa gəlmək mümkün olmasa, komanda liderlərindən birini itirəcək və bu boşluğu doldurmaq çətin olacaq. Hadisələrin necə cərəyan edəcəyini yaxın günlərdə görəcəyik.

ABDULLA İSMAYILOĞLU