“Sumqayıt” bərbad oyun göstərdi? Bəlkə də dünənki oyun üçün “bərbad” ən yüngül ifadədi.

Fiasko idi? Yox, bu da deyildi. Bəs nə idi? Sadəcə, rəzalət! Samir Abasov “Kəpəz”lə qarşılaşmadan sonra komandasının elitada qalmağa layiq olmadığını demişdi. “Qarabağ”la matç bir daha onun haqlı olduğunu göstərdi. Baş məşqçi oyunsonrası mətbuat konfransında futbolçularının 2-3 düzgün ötürmə verə bilmədiyini vurğuladı. Bunu bacarmayan komandanın elitada nə işi var? Ən acınaqlısı isə “kimyaçılar”ın xaraktersizliyidi.

Evdə, dolu tribunalar önündə oynayan futbolçular ilk dəqiqələrdən məğlubiyyətlə barışdı. Adama elə gəlirdi ki, “Sumqayıt” hələ meydana çıxmamış, paltardəyişmə otağında yenilgi ilə barışıb. Xarakteri olan komanda, heç olmasa, döyüşər, rəqibin oyunçularına qarşı sərt oynayar və buna görə sarı vərəqə alar. 90 dəqiqə ərzində yalnız Bədəlov hakimin qəzəbinə tuş gəldi. Bu nəyi göstərir? Bu o deməkdi ki, “Sumqayıt”ın ruhu ölüb, meyidi ortada qalıb. Sadəcə, ağlayanı yoxdu. Komanda Abasovun dönəmində 3-cü böyükhesablı məğlubiyyətini aldı: “Sabah” – 0:6, 0:4, “Qarabağ” – 0:6…

Gözdən qaçmadı

* “Qarabağ”ın hər Sumqayıt səfərində olduğu kimi, bu dəfə də oyunu stadiondan izləmək istəyənlərin sayı yetərincə çox idi. Matçdan təxminən yarım saat əvvəl tribunalar dolduğundan asayiş keşikçiləri 500-ə yaxın futbolsevərin arenaya girişinə icazə vermədi.
* Oyundan sonra azarkeşlərin Qurban Qurbanovla şəkil çəkdirmək istəyi anlaşılan idi. Onların sayı çox olsa da, mütəxəssis heç kimi qəlbinə dəymədi.