Ötən cümə Finlandiya və Latviyada hokkey üzrə dünya çempionatı start götürdü.

"Football-plus.az" xəbər verir ki, ötən ilin fevralında Ukrayna ərazisinin işğalı planlarını yerinə yetirməyə başlayan Rusiyanın yığması məlum səbəbdən mundiala qatılmayıb. Ancaq ruslarsız da turnir ulduzlar baxımından yoxsuldu. Komandaların iştirak ərizəsində belələrinin sayı azdı. Uzaqbaşı müntəzəm çempionatda 100-dən artıq xal toplayan, ev turnirində iştiraka razılıq verən “Kolorado”nun bombardiri Rantanenin adını çəkmək mümkündü.

Bəzi başqa hokkeyçilər də ümumi fonda fərqlənir. “Detroyt”un tərəqqi edən müdafiəçisi Zayder Almaniya, “Vinnipeq”in forvardı Elers Danimarka yığmasının düşərgəsindədi.

Bəzi ulduzların isə hazırda Stenli kuboku uğrunda mübarizə aparan komandaların düşərgəsində olduğunu unutmayaq. Mundialın daimi favoritlərindən sayılan Kanada və ABŞ yığmaları da əsas oyunçularına güvənməyib.

“Kalqari”dən Luçiçin buz üzərinə çıxması hamını təəccübləndirdi. Yaxınlarda 35 yaşını tamamlayacaq hokkeyçi ilk dəfə böyüklər səviyyəsində Kanada yığmasının formasını geyməyə razılıq verdi.

Xatırladaq ki, qruplarda ilk 4 yeri tutan komandalar növbəti mərhələyə adlayacaq.