Yanğına görə oyun gec başladı

Finlandiyada keçirilən hokkey üzrə dünya çempionatı davam edir.

"Football-plus.az" xəbər verir ki, hələ ki yalnız üç komanda – Kanada, İsveçrə və İsveç yığmaları məğlubiyyətsiz irəliləyir. Srağagün keçirilən Almaniya – Danimarka oyunu Bakı vaxtı ilə 17.20-də başlamalıydı, ancaq 1 saat 40 dəqiqə yubandı. Buna Helsinkidəki arenada baş verən yanğın səbəb oldu. Bütün azarkeşlər və hokkeyçilər evakuasiya olunandan sonra arenaya yanğınsöndürən maşınlar yaxınlaşdı. Heç kim xəsarət almadı.

DÇ-də daha bir maraqlı hadisə baş verib. Belə ki, Slovakiyanın RTVS kanalının əməkdaşı Barbora Jaçikova Almaniya yığmasının baş məşqçisinin köməkçisi Cessika Kempbellə bu sualla müraciət edib: “Yaraşıqlı kişilərin əhatəsində belə cəlbedici qadın olmaq necə hissdi? Bəlkə kimsə başqalarından daha çox xoşunuza gəlir?” Cessika əvvəlcə sualı anlamayıb: “Bağışlayın, nə demək istədiyinizi anlamadım”. Xanım həmkarımız sualı təkrarlayandan sonra onun cavabı belə olub: “Bu mənim işim, mənim peşəmdi. Oyunçular öz işini görür. Oyunçularla aramızda yaxşı və peşəkar münasibətlər var, başqa heç nə”.
Cessika müsahibədən sonra Almaniya yığmasının mətbuat katibinə bu sualdan heç xoşlanmadığını deyib.