Ötən həftəsonu İspaniyanın 19 yaşlılar arasında çempionatı çərçivəsində baş tutan Madrid derbisində diqqətçəkən bir qalmaqal yaşanıb.

"Football-plus.az" xəbər verir ki, 1/4 final çərçivəsində ''Real'' və ''Atletiko''nun U-19 komandaları arasında oyun 2:2-lik bərabərliklə yekunlaşıb. İlk görüşdə səfərdə 2 cavabsız qolla qalib gələn ''Real'' yarımfinala adlayıb. Cavab oyununda ''Atletiko'' 2 top fərqi ilə öndə idi. Amma ''Real'' hesabı bərabərləşdirə bildi. ''Real''ın U-19 komandasını Alvaro Arbeloa, ''Atletiko''nun U-19 komandasını isə yaxın keçmişin məhşur forvardı Fernando Torres çalışdırır. Bərabərlik qolundan sonra məşqçilər arasında münaqişə yaşandı. Arbeloa Torresə acıq verdi. Torres isə həmkarını itələyərək ona ''sənin başını əzərəm'' dedi. Nəticədə hakim Arbeloaya sarı, Torresə qırmızı vərəqə göstərdi. Halbuki bu ikili sabiq komanda yoldaşları olublar. Onlar 2007-09-cu illərdə ''Liverpul''da birlikdə top qovublar. Bundan başqa İspaniya yığmasının dünya futbolunda ağalıq etdiyi dönəmdə - 2008-12-ci illərdə də onların hər ikisi heyətdə olub. Həm Torres, həm də Arbeloa yığmanın heyətində 2010-da dünya çempionatını, 2008 və 2012-də isə Avropa Çempionatının qalibi olub.