“Fikrimcə, de-yure bu problemi həll etməsələr də, de-fakto həm "Kəpəz", həm də mövsümün əvvəlində avrokuboklara vəsiqə qazanmaqdan dəm vuran "Sumqayıt" arzusuna çatıb. Qalan iki "can verən" - "Səbail"lə "Şamaxı"ya gəlincə, fərqli mənzərələr formalaşıb. Hələ ilk dövrənin gedişində "Şamaxı"nın kağız üzərindəki baş məşqçisi Vüqar Əsgərliyə legioner xidmətindən yararlanmamağın səhv olduğuna dair sual ünvanlamışdım. Öz aləmlərində daha çox azərbaycanlıya şans tanıdıqları üçün belə qərar verdiklərini dilə gətirən məşqçiyə "bu gün 4 legionerin xidmətindən yararlanın ki, növbəti mövsüm də 7 azərbaycanlı balası premyer-liqada oynamaq şansını saxlasın" demişdim.

Aydın məsələdi ki, Əsgərli öz fikrini yox, onu "Şamaxı"ya təyin edənlərin dediklərini öz adından söylədi: "Biz premyer-liqada qalacağıq". Elə "Şamaxı" rəhbərliyi də analoji bəyanat yayıb ki, AFFA qaydaları arxa plana keçirməli, "Azərbaycan futboluna təmənnasız xidmət edən" klubu, sonuncu olsa belə, elitada saxlamalıdı. Gülməli bəyanatdı. "Böyük dayaq" filmində deyilən məşhur ifadə düşür yada düşür:

"Partkomu Şirzad olanın komsomolu da sənin kimi olar".

İdarə Heyətində Orxan Fikrətoğlu olan klubun bəyanatı da elə bu səviyyədə olar. "Səbail"ə gəlincə, məncə, paytaxt təmsilçisinin iddiaları da böyük idi. Lakin bir məqam unuduldu ki, "Səbail" son illərin əvəzsiz autsayderi idi. Bu psixoloji sindromu üzərindən atmaq heç də asan deyil.

Zənnimcə, kimin aşağı liqaya yuvalanacağına dair suala "Səbail" - "Şamaxı" görüşündə aydınlıq gələcək. Görünən isə budu ki, həlledici rolu Şahin Diniyevin təcrübəsi oynayacaq”.

“Turnir cədvəlinin son pillələrində gərgin mübarizəyə şahidlik edirik. “Şamaxı” elitanı tərk etmək təhlükəsi ilə üz-üzədi. “Səbail”in də durumu ürəkaçan deyil. İndi əsas məqam futbolçuların psixoloji cəhətdən hansı vəziyyətdə olmalarıdı. Onlar bu yükün altından nə dərəcədə çıxa biləcəklər? Stressli vaxtdı. Heç kim premyer-liqanı tərk etmək istəmir. Hər iki kollektivin üzərində təzyiq var. Son oyunlarda qeydə alınan nəticələrə baxsaq, “Səbail” bir qədər şanslı görünür. Şahin Diniyevin çalışdırdığı komanda toparlana bilib.

Sumqayıtdakı parlaq qələbə belə düşünməyə əsas verir. Bu da onlara əlavə motivasiyadı. “Şamaxı” isə son matçlarda sanki özünə bənzəmir. Aqressiv, sürətli, istəkli komandanı görə bilmirik. Bu da nəticələrdə əksini tapır.

Fikrimcə, bu psixoloji durumdan irəli gəlir. Oyun baxımından Cavid Hüseynov - Vüqar Əsgərli duetinin çalışdırdığı kollektiv mövsümboyu ikinci “beşlik”dəki rəqiblərin heç birindən geri qalmırdı. Çempionatın son 3 turu həm gərgin, həm də çox maraqlı olacaq. Son turda bu iki komanda bir-biri ilə qarşılaşacaq. Kimin elitada qalacağını, kimin diviziona yuvarlanacağını həmin 90 dəqiqədən sonra biləcəyik”.

“Kimin elitada qalacağı ilə bağlı indi ancaq ehtimallar üzərindən danışa bilərik. Premyer-liqanı tərk etmək təhlükəsi yaşayan komandaları qarşıda çox çətin oyunlar gözləyir. “Şamaxı” “Neftçi”nin qonağı olacaq. “Ağ-qaralar” iki ağır məğlubiyyətdən sonra azarkeşlərinin könlünü almaq üçün ancaq qələbəyə köklənəcək.

“Səbail” “Qarabağ”ı evində qonaq edəcək. Ağdamlılar böyük ölçüdə artıq çempiondu və bu səbəbdən onlarda motivasiya “Neftçi”dəki kimi olmayacaq. Üstəlik matç süni örtükdə keçiriləcək ki, bu da “Qarabağ”a həmişə çətinlik yaradıb. Bu üzdən 34-cü turda “Səbail”in xal qazanmaq şansı “Şamaxı”dan daha çoxdu. Növbəti turda “dənizçilər”i çətin Tovuz səfəri gözləyir. Ayxan Abbasovun komandası cari mövsümdə öz meydanında liderlərə çətin anlar yaşada bilib. Ancaq onlar artıq minimum vəzifənin öhdəsindən gəlib. “Şamaxı” isə evdə “Qəbələ”ni qəbul edəcək.

“Qırmızı-qaralar” indi elə vəziyyətdədi ki, hər xal uğrunda sona qədər vuruşur. Deməyim odu ki, “Səbail”dən fərqli “Şamaxı”nı hər iki turda motivasiyalı komanda gözləyir. Yox, hər şey son tura qalarsa, yenə Şahin Diniyevin komandası bir addım öndədi. “Şamaxı” məhz “ASCO Arena”da “Səbail”in qonağı olacaq”.