“Regionda uzun illər futbolun inkişafına yetərincə diqqət ayrılmadığından bir sıra problemlər var idi. Bunun aradan qaldırılması istiqamətində klubun prezidenti Vüqar Abbasovla görüşlərimiz oldu, məsələləri müzakirə etdik və həll etmək üçün planlaşdıranı tamamladıq. Ondan sonra mərhələli şəkildə çatışmazlıqların aradan qaldırılması istiqamətində işlərə başladıq. Əvvəlcə bütün regionda hər yaş qrupundan ibarət komandalar formalaşdırmağa çalışdıq. Daha sonra isə bu komandaların qeydiyyat məsələlərini həll etməyə başladıq. Bu iş çox vaxtımızı aldı. Şükürlər olsun ki, AFFA-nın qeydiyyat şöbəsinin bütün əməkdaşları bu işdə bizə yardımçı oldu və problemi həll edə bildik. Daha sonra AFFA ilə birgə martın sonları, aprelin ilk yarısında U-13, U-14 və U-15 komandalarının dairəvi sistemlə çempionatlarını keçirdik . Burda böyük sıxıntımız digər rayonlardan komandaların oyunlara getmələri idi ki, bu xərcləri də AFFA üzərinə götürdü. Hazırda U-15 liqasında oyunlar davam edir. Mayın sonlarına yaxın AFFA ilə birgə U-10, U-11 və U-12 liqalarını keçirməyi planlaşdırırıq. Qeyd etdiyim kimi, regionda uzun müddət futbolun inkişafına diqqət ayrılmadığı üçün U-16, U-17 və U-19 komandalarını formalaşdırmaq mümkün olmadı. Lakin bu il çəkdiyimiz əziyyət boşa getmədi. Növbəti mövsümdən bu il U-15 liqasında oynayan komandalar U-16-da çıxış edəcək.

Futbol camiəsində söylənilənlərə inansaq, “Araz Naxçıvan” premyer-liqada çıxış edəcəyi təqdirdə klubun U-17 və U-19 komandaları Bakıda məskunlaşacaq. Adil bəylə söhbətdə bu məsələyə də aydınlıq gətirməsini istədik: “Bəli, ilk növbədə belə planlaşdırmışıq. Lakin bunun üçün də klub rəhbərliyi ilə məsləhətləşəcəyik. Yaxın günlərdə yekun qərar məlum olacaq.

Xatırlayırsızsa, martda gənclər və idman naziri Fərid Qayıbovun əmri ilə 30 ildən artıq Uşaq-Gənclər Olimpiya Ehtiyatları Futbol Məktəbinin direktoru postunu tutan Kazbek Tuayev yaş həddinə görə vəzifəsindən uzaqlaşdırılıb. Gəzən söz-söhbətə inansaq, boş qalan kresloya əsas namizəd məhz Adil Şükürovdu. Onun məsələyə münasibəti belə oldu: “Söz-söhbətdən başqa bir şey deyil. Hazırda başqa bir layihə üzərində çalışıram. Yaxın günlərdə bununla bağlı ictimaiyyətə ətraflı məlumat verəcəm”.