Federasiyanın sədr müavini “Araz Naxçıvan”la bağlı xəbərləri təkzib etdi
Son günlər mətbuatda “Araz Naxçıvan”ın maliyyə problemi ilə üzləşdiyi haqda xəbərlər dolaşır.
Yazılanlanlara inansaq, Muxtar Respublikada yaşanan proseslər, rəhbər şəxslərin sorğu-suala çəkilməsi divizionun liderindən də yan keçməyib.
Football-plus.az xəbər verir ki, “Cahan Holdinq”in sponsoru olduğu klubun da mühasibat sənədləri Bakıdan gələn komissiya tərəfindən təftiş olunur, “Araz Naxçıvan” rəsmiləri onlara görülən işlər və xərclənən vəsait ilə bağlı hesabatlar təqdim edir.
Söylənilənlərə aydınlıq gətirmək, “Araz Naxçıvan”ın düşərgəsində nələrin yaşandığını dəqiqləşdirmək üçün Naxçıvan Fubol Federasiyasının sədr müavini Sakit Rzayevlə əlaqə saxladıq:
“Açığı, mən də sizin kimi mətbuatdan oxuyuram ki, “Araz Naxçıvan”da maliyyə problemi yaşanır. Əslində klubda bu yöndə heç bir çətinlik yoxdu. Futbolçuların məvacibi vaxtında ödənilib. Komanda hazırda “Zaqatala” ilə oyuna hazırlaşır. Sizinlə danışdığım vaxt kollektiv Azər Bağırovun rəhbərliyi altında məşqdədi. İki həftə əvvəl Lisenziyalaşdırma Komissiyasının üzvləri Naxçıvanda olublar. Görülən işlərlə yerində tanış oldular. Bizim əsas məqsədimiz premyer-liqaya yüksəlməkdi ki, bu istiqamətdə də çalışmalarımız davam edir. Lisenziyalaşdırmanın tələblərini yerinə yetirmək üçün hər sahəyə cavabdeh şəxs təyin olunub. Qısası, heç bir axsamadan, çatışmazlıqdan söhbət gedə bilməz. Əksinə, klubun əsas sponsoru “Cahan Holdinq” Şirkətlər Qrupunun prezidenti Vüqar Abbasov lisenziyalaşmanın tələblərini yerinə yetirməyi tapşırıb”.
RƏŞAD
Digər xəbərlər
