“Araz Naxçıvan” idman prinsiplərinə görə artıq premyer-liqaya vəsiqəni təmin edib. Qeyri-adi heç nə yaşanmasa, Naxçıvan klubu 2023/24 mövsümündə elitada çıxış edəcək.

AFFA-nın qərarına əsasən, premyer-liqada mübarizə aparan klubların aşağı yaş qruplarının və əvəzedici heyətinin olması vacibdi. Divizionda çıxış etdiyi müddətdə “Araz Naxçıvan”ın nə U-19 komandası olub, nə də əvəzedici heyəti. Bu səbəbdən naxçıvanlılar lisenziyalaşdırmanın tələblərinə uyğun addım atmağı, növbəti mövsüm üçün tələb olunan yaş qrupları üzrə komandaları formalaşdıracaqlarını bildirib.

Bu günlərdə sözügedən məsələ ilə bağlı “Football-plus.az” a məlumat daxil olub. Əldə etdiyimiz bilgiyə əsasən, elitanın digər təmsilçiləri U-19 və əvəzedicilərin Naxçıvana səfər etməsinin klublara əlavə maliyyə yükü olduğunu, səfər xərclərinin assosasiya tərəfindən qarşılanmasını istəyib. AFFA isə vəziyyətdən çıxış yolu kimi Naxçıvan təmsilçisinin U-19 və əvəzedici komandalarının Bakıda məskunlaşmasını, ev oyunlarını paytaxtda keçirməsini istəyib. Klub rəhbərliyi də bu şərtlə razılaşıb.

RƏŞAD