Neymar qalmaqala səbəb olan hərəkəti ilə diqqət mərkəzinə düşüb. PSJ-nin hücumçusu klubun imicinə mənfi təsir edən fikri bölüşüb.

"Football-plus.az" xəbər verir ki, braziliyalı futbolçu sosial şəbəkələrdə Paris təmsilçisini “kiçik klub” adlandıran və rəhbərliyi tənqid edən paylaşımı bəyənib.

“Möhtəşəm görünmək ilə əslində əla olmaq arasında fərq var! Klubun böyük tarixi yoxdu, amma özünü böyük kimi göstərir. Bu, kiçik bir klub mentallığıdı!” - deyə müəllifin yazdığı paylaşımda bildirilib.

Futbolçunun bu paylaşımı bəyənməsinə klub rəhbərliyinin hansı reaksiya verəcəyi maraq doğurur. Qeyd edək ki, Neymar daha əvvəl PSJ-nin hücumçusu Lionel Messinin “Barselona”nın formasında təsvir olunduğu paylaşımı da bəyənib.

Xatırladaq ki, çərşənbə günü  PSJ-nin azarkeşləri klubun ofisi qarşısında rəhbərliyə və bir sıra futbolçulara qarşı aksiya keçiriblər. Həmçinin azarkeşlərin bir hissəsi Neymarın Parisdəki evinin qarşısında aksiyaya davam ediblər.

Son xəbərlərə görə, klub Neymarı yayda sonradan satılmaq şərti ilə icarəyə verməyi planlaşdırır. Onun aqibəti prezident Nasser Əl-Xelayfi ilə futbolçunun agenti Pini Zahavi arasında keçiriləcək görüşdə müəyyənləşəcək. Son vaxtlar Səudiyyə Ərəbistanı klubları Neymara maraq göstərirlər. Ancaq ulduz futbolçu bu ölkədə oynamaq niyyətində deyil.