PSJ-nin ulduzu Neymar adəti üzrə yenə futboldan kənar olayla diqqət mərkəzinə düşüb. Hamı üçün mövsüm davam etsə də, braziliyalı üçün zədə üzündən mövsüm çoxdan başa çatıb.

"Football-plus.az" xəbər verir ki, martda əməliyyat olunan və 3-4 aylığa sıradan çıxan tanınmış futbolçu boş vaxtını sevimli məşğuliyyəti ilə - onlayn kazino və qumar oynamaqla keçirir.

Ümumiyyətlə videooyun dünyasında çox fəal olan Neymar tez-tez ''tviç'' platformasında canlı yayın açır. Son yayında 30 yaşlı futbolçu onlayn-kazino oynamaq qərarına gəldi və küllü miqdarda pul itirdi. Daha dəqiq desək 1 saata təxminən 1 milyon avro! Onun sonrakı hərəkətləri isə tənqid obyektinə çevrildi.

''Sambaçı'' əvvəlcə bu qədər pul itirdiyinə görə özünü üzgün olmuş və ağlayırmış kimi göstərsə də, sonradan gülməyə başladı. İzləyicilərin versiyasına görə bu pul Neymarın özünün deyilmiş. Həmin onlayn kazino futbolçuya bu layihəni reklam etmək üçün bu pulu veribmiş. Amma lap öz pulu olsa belə, 1 milyon avro Neymar üçün çətin ki, ciddi itki sayılsın. Çünki onun aylıq qazancı 4 milyon avroya yaxındı.

Tez-tez poker üzrə turnirlərə qatılan və bu oyunun böyük pərəstişkarı olan Neymar hətta fevralda ''Bavariya''ya qarşı oyundan sonrakı gecə Parisdə ''European Poker Tour'' turnirində iştirak etmişdi. Komandasının məğlubiyyətindən bir neçə saat sonra əyləncəyə yollandığı üçün o, fanatlar tərəfindən tənqid olunmuşdu.

''Forbes'' jurnalının versiyasına görə Neymar 2022-ci ildə 95 milyon dollarlıq gəliri ilə Lionel Messi, Lebron Ceyms və Kriştiano Ronaldodan sonra dünyanın ən çox qazanan 4-cü idmançısı olmuşdu.

ƏLİ