“Trabzonspor” o qədər qarışıq və bərbad mövsüm keçirir ki, komandanın cəmi 1 il öncə cempion olduğuna adamın inanmağı gəlmir. Bu bir ildə qaradənizlilər faktiki zirvədən zirzəmiyə yuvarlanıblar.

"Football-plus.az" xəbər verir ki, əvvəlki rəhbərlik və çempionluğun baş memarı Abdulla Avcı da artıq komandada yoxdu. Amma bu dəyişiklik də fayda verməyib. Psixoloji cəhətdən inanılmaz eniş yaşayan “bordo-mavililər” xorvatiyalı Nenad Byelitsa ilə də məğlubiyyətləri sıralayırlar.

Çox güman, mövsümün sonunda heyətdə ciddi dəyişikliklər olacaq. Yayda müqavilə müddəti bitəcək oyunçulardan biri də Marek Hamşikdi. Slovakiyalı çempionluqda heç də az rol oynamamışdı. Amma bu mövsüm o da başqaları kimi ortalıqda görünmür. 35 yaşlı futbolçu zədə və başqa səbəblər üzündən bu mövsüm superliqada cəmi 8-i start heyətində olmaqla 18 oyun keçirib. Onun yayda komandadan ayrılacağı gözlənilir. Hamşik dünənki məşqdən öncə türkiyəli həmkarlarımıza açıqlamalar verərək uzun illər şərəfini qoruduğu “Napoli”nin uğuruna da toxunub:

“Trabzonspor” da “Napoli” kimi çox özəl bir klubdu.

Təbii ki, indiki durumumuzdan heç birimiz razı deyilik. Amma futbol məhz belə oyundu. Bəzən hər şey alınır. Bəzən isə nə etsən də, heç nə alınmır. 35 yaşım olsa da, hər gün üzərimdə çalışıram. “Trabzonspor”un daha yaxşı olması üçün əlimdən gələni etmək istəyirəm. Baş məşqçi dəyişikliyi hər klubda asan proses deyil. Hər birimiz səbirli olmalıyıq. Burda cəmi 2-ci mövsümümü keçirirəm. 2 il ərzində bəzi fanatların gözündə əfsanə səviyyəsinə çatmışamsa, bundan yalnız məmnunluq duya bilərəm. Slovakiyada mənim adımı daşıyan bir akademiya açmışam. Karyeramı bitirəndən sonra diqqətimi ora yönəldəcəm. Yeni oyunçular yetişdirmək baxımından çox həvəsliyəm. Təcrübəmi onlarla bölüşmək istəyirəm. Hazırda orda 400-ə yaxın uşaq futbolla məşğul olur. Amma karyeramı nə vaxt bitirəcəyimə qərar verməmişəm. Futboldan doyana qədər oynamaq, dadını çıxarmaq istəyirəm. Bu mövsümün ilk günlərindən işlər istədiyimiz kimi getmədi. Çünki diqqətimizi Çempionlar Liqasına yönəltmişdik.

Qrup mərhələsinə vəsiqə qazanmaq əsas hədəfimiz idi. Amma bunu reallaşdıra bilmədik. Uzun müddət bu uğursuzluğun psxiloji təzyiqini üzərimizdən ata bilmədik. Sıx təqvim də bizi çətinə saldı. Uğursuzluq zolağına düşdükdə bir-birinin ardınca tez-tez oyunlar keçirmək asan məsələ deyil. Amma bunlar hamısı geridə qalıb. Artıq bundan sonrakı dönəmə köklənməliyik. Yeni baş məşqçi gəlib və bizə yeni oyun anlayışını aşılamağa çalışır. “Trabzonspor”u qarşıda gözəl günlər gözləyir. Hücumameyilli mərkəz yarımmüdafiəçisi mövqeyi meydanda özümü ən rahat hiss etdiyim mövqedi. Həmin mövqedə qol və məhsuldar ötürmələrimlə komandaya daha çox fayda verə bilirəm.

“Napoli”nin, nəhayət, çempion olması məni çox sevindirir. 33 ildən sonra gələn bir çempionluq olduğunu nəzərə alsaq, şəhərdə hələ uzun müddət bunu qeyd edəcəklər. Amma mən çempionluq tədbirinə qatılmayacam”.