Aprelin 28-də PFL-in saytı belə bir xəbər paylaşdı: “30 aprel tarixinə nəzərdə tutulan “Neftçi” - “Qarabağ” oyunu 2 may tarixinə keçirildiyinə görə 33-cü turun “Azərsun Arena”da keçiriləcək “Qarabağ” - “Qəbələ” qarşılaşması 8 may, saat 20.00-da start götürəcək”.
Qərarın anlaşılmayan tərəfləri var. Mayın 8-i bazar ertəsinə təsadüf edir. Belə çıxır ki, 33-cü turun müddəti 1 gün də uzanacaq. “Qarabağ” “Neftçi”ylə bu gün görüşəcək. Mayın 2-dən 7-nə 5 günlük fərq var. Bildiyimiz qədər bir komanda 48 saat fasilədən sonra ikinci oyuna çıxa bilər. Ən azı bunu DÇ, AÇ, KL kimi turnirlərdə görürük. Belə olan halda nə üçün “Qarabağ” – “Qəbələ” matçının tarixi dəyişdirilib? Onsuz da ağdamlılar avrokuboklarda çıxış edərkən müntəzəm həftə ərzində iki oyun keçirir. Yəni 3-4 gündən bir matça çıxmaq “köhlən atlar” üçün adi haldı. O zaman nə üçün oyun başqa tarixə salınıb?
"Football-plus.az" olaraq suallarımızı PFL-in texniki-idman direktoru Elgiz Abbasova ünvanladıq:
"Bilirsiz ki, mövsümün əvvəlindən sonuna kimi dəyişiklikləri minimum həddə salmışıq. Bu gün araşdırma aparsaz, görərsiz ki, say azalıb. Qlobal məqamlar həmişə nəzərə alınmalıdı. Düzdü, istəyirdik ki, “Neftçi” – “Qarabağ” matçı aprelin 30-da keçirilsin. Həmin vaxt da bazar gününə təsadüf edirdi. Bu matça azarkeşlərin daha çox gəlmək ehtimalı var idi. İstəyirdik ki, görüşü daha çox adam izləsin. Sadəcə, yekun qərarlardan sonra görüşün tarixi mayın 2-nə dəyişdirildi. Burda da azarkeşləri nəzərə aldıq. Görüşü elə vaxta təyin etdik ki, fanatlar matçı əvvəldən sona kimi izləyə bilsin. Bəli, “Neftçi” ilə oyundan sonra “Qarabağ”ın “Qəbələ” ilə matç üçün yetərincə vaxt var idi. Lakin bu dəyişiklik heç bir xarici təsir olmadan alındı. Əvvəlcədən nəzərdə tutulan, planlaşdırılan təqvim deyildi. Biz bunu 1 ay öncədən açıqlamışdıq. Amma hansısa dəyişiklik olanda, burda bir yox, bütün komandalar nəzərə alınmalıdı.
İstirahət və oyun balansını tənzimləmək lazımdı”.
İLKİN SULTANLI