"Səfərə qələbə üçün gəlmişdik. Rəqibimiz yaxşı komandadı. Heyətə futzaldan Xətai Bağırov, Ramiz Çovdarov, Eşqin Tağıyev kimi oyunçuları cəlb ediblər. Maraqlı qarşılaşma alındı. Üstün tərəf idik. Çoxsaylı qol imkanlarımız vardı. İkisi yüzfaizlik idi, amma boşa verdik. Biz fürsətləri qaçırdıq, rəqib isə standart vəziyyətdən sonra qapımıza yol tapdı. Buna rəğmən, rəqibə rahat oynamağa imkan vermədik. Çoxları bizi qınayır ki, təcrübəli futbolçulara çox şans veririk. Amma "Qusar" da bizimlə oyunda təcrübəli oyunçulara güvənmişdi. Bizdə ən yaxşı çıxış edən 43 yaşlı Ruslan Poladov idisə, rəqibdə oynayan-məşqçi Tural Cəlilov idi. Tural ən yaxşı oyunlarından birini keçirdi. Sözümün canı odu ki, əsas futbolçuların yaşı yox, meydanda sərgilədiyi oyundu.

İlk matçda heç-heçəyə nail olsaq da, cavab görüşündə mərhələni keçəcəyimizə inanıram. Ümumiyyətlə, şəxsi qənaətim budu ki, "Qusar" - "Füzuli" cütünün qalibi Region Liqasının çempionu olacaq".