Basketbol üzrə Avroliqada son iki gündə 1/4 final seriyası çərçivəsində ilk oyunlar keçirildi.

"Football-plus.az" xəbər verir ki, bu arada müntəzəm çempionatın yekunlarıyla bağlı bəzi maraqlı məqamlar açıqlanıb. “Partizan” ev oyunlarında tamaşaçı sayına görə hamını qabaqlayır. Belqrad klubunun hər ev oyununu orta hesabla 17723 tamaşaçı (stadionun tutumu 18500 yerdi) izləyib. Bu isə arenanın mövsüm ərzində 96 faiz dolması deməkdi. Serbiya klubundan sonrakı pillədə 14809 orta seyrçi sayı (96 faiz dolu, 15415 yer) ilə Litva “Jalgiris”i, 3-cü yerdə isə Türkiyə “Efes”i (13099/16500, 79 faiz) qərarlaşıb.

Ev oyunlarına orta hesabla ən az tamaşaçı gələn komanda “Panatinaikos”du. Yunanıstan nəhənginin hər ev oyununu 5985 tamaşaçı (18310 yer) izləyib ki, bu da tribunalardakı yerlərin cəmi 33 faizinin dolması deməkdi. “Monako” Avroliqa iştirakçıları arasında ən aşağı göstəriciyə malikdi. Ancaq hər ev oyununa cəmi 4299 tamaşaçı toplayan knyazlıq komandasının arenasında tutumun 4600 yerlik olduğunu da xatırladaq. Yəni hər ev oyununda yerlərin 93 faizi dolub.