Misli premyer-liqasının 1-ci turunun “Turan Tovuz” – “Qəbələ” görüşünü 5500 tamaşaçı izləyib.


"Football-plus.az" xəbər verir ki, məlumatı Peşəkar Futbol Liqasının rəsmi saytı yayıb. Azərbaycan çempionatının oyununda belə çox azarkeşə sonuncu dəfə təxminən 3 il əvvəl təsadüf olunub.

2019/20 mövsümünün 4-cü turunda “Qarabağ”la “Neftçi” arasında qarşılaşmanı 7000 tamaşaçı izləyib. 2019-cu il sentyabrın 15-də baş tutan Azərbaycan derbisində Ağdam klubu 2:0 hesabı ilə qalib gəlib.

Tofiq Bəhramov adına Respublika stadionunda baş tutan həmin görüşdən 1058 gün sonra premyer-liqada tamaşaçı sayı ilk dəfə 5 mini keçib.

Bu müddətdə 2019/20 mövsümü 20 turdan sonra dayandırılıb, 2020/21 mövsümü tamaşaçısız keçirilib. 2021/22 mövsümü və 2019/20 mövsümünün baş tutan son 16 turunda belə göstərici qeydə alınmayıb.

Ümumilikdə isə 1-ci turu 10600 adam izləyib. Bu rəqəm orta hesabla hər görüşə 2150 nəfərə bərabərdi. Bu da son 1058 gün üçün rekorddu. 2019/20 mövsümünün 4-cü turunun 4 qarşılaşmasında 9800, orta hesabla 2450 azarkeş olub.

Qeyd edək ki, Tovuz şəhər stadionundakı matçda qonaqlar 2:0 hesabı ilə qalib gəlib.