Birinci divizionda çıxış edən “Sumqayıt-2”də növbəti baş məşqçi dəyişikliyi olduğundan xəbəriniz var.

Turnir cədvəlinin sonuncu pilləsində qərarlaşan “kimyaçılar”ın "sükan arxası"na bu dəfə Vaqif Cavadov gətirilib. Xatırladaq ki, mövsümə Vüqar Quliyevin rəhbərliyi altında başlayan komanda ikinci dövrənin əvvəlində Azər Mehdiyevə tapşırılmışdı.

“Football-plus.az”a müsahibə verən Vaqif bəylə söhbətdə təyinatı və gələcək planları barədə danışdıq.

- Öncə təynatla bağlı fikrlərinizi bilmək istərdik.
- Etimad göstərdiklərinə görə rəhbərliyə “çox sağ ol” demək istəyirəm. Düzdü, komanda hazırda turnir cədvəlində arzu olunan yerdə deyil. Ancaq çalışacağıq ki, qarşıdakı turlarda azarkeşləri, klub rəhbərliyini sevindirək. Məndən əvvəl komandanı çalışdıran məşqçilərin də əməyini qeyd etmək istəyirəm. Onlar yaxşı kollektiv formalaşdırıblar.

- Mövsümün sonuna bir neçə tur qalmış, sonuncu pillədə gedən komandanın “sükanı arxasına” keçməyiniz bir qədər təəccüblü oldu...
- Burda təəccüblü heç nə yoxdu. İndidən gələcək mövsümlə bağlı planlar cızmaq lazımdı. Hazırda heyətdə oynayan futbolçuları yaxından tanımaq istəyirəm ki, sabah kimisə komandadan kənarlaşdırdıqda “Vaqif müəllim, siz məni harda gördüz, meydanda şans vermədiz” sözünü eşitməyim.

- Əvəzedici komandanı çalışdırmaq bəlkə də karyeranızda irəli addımdı. Ancaq əvəzedicilərin heç bir turnir hədəfi yoxdu. Halbuki, U-19-un qarşısında konkret məqsəd var: çempion ol və UEFA Gənclər Liqasında iştirak et. Belə olan halda baş məşqçi kimi nəyə köklənəcəksiz, motivasiya nə olacaq?
- Bəli, onu düz qeyd etdiz ki, U-19 liqasında konkret hədəf var. Ancaq unutmayaq ki, əvəzedici heyət əsas komandanın bazasıdı. Bu isə böyük futbol deməkdi. Əsas məqsədimiz “Sumqayıt”ın əsas komandasına futbolçu yetişdirməkdi. Klubun ikinci komandasını çalışdırmağın da öz həyacanı var.

- 3 ilə yaxındı akademiyada çalışırsız. “Sumqayıt”ın akademiyasında istedadlı, gələcək adına perspektiv vəd edən yeniyetmə və gənclər görürsüz?
- Bəlkə də əvvəlki illərdə kənardan bir–iki oyun izləyib fikir bildirməkdə çətinlik çəkərdim. Ancaq indi nəinki “Sumqayıt”, ölkədə fəaliyyət göstərən başqa akademiyalar, futbolçular haqda ətraflı məlumatım var.

Bir müddət U-17-ni çalışdırdım. Cari mövsümdə U-19-da baş məşqçi olduğumdan çempionatın gedişində rəqib komandaların da heyətindəki gəncləri gördüm. “Sumqayıt”la yanaşı, o biri komandalarda da yaxşı uşaqlar var. Onları düzgün istiqamətləndirmək, karyeralarını inkişaf etdirmək üçün kömək etmək lazımdı. Əminliklə deyə bilərəm ki, klub rəhbərliyi hazırkı strategiyanı davam etdirəcəyi halda yaxın illərdə həm əsas komandada, həm də müxtəlif yaş qrupu üzrə yığmalarda indikindən daha çox akademiyanın yetirmələrini görə biləcəksiz. Klub rəhbərliyi akademiyanı daim diqqətdə saxlayır, aşağı yaş qrupları üçün istənilən şəraiti yaradır.

RƏŞAD