"Şamaxı" - "Kəpəz" qarşılaşmasından sonra qonaqların məşqçisi Vidadi Rzayevlə söhbət etdik.

Veteran futbolçu "Football-plus.az" saytına "Kəpəz"in çıxışı, elitada komandaların artırılması və yığmamızın uğursuz çıxışı barədə fikirlərini dilə gətirdi.

- Çempionatın sonuna 5 tur qalıb. Qarşıdakı oyunlarınız daha da ağır olacaq. Bu barədə nə deyərdiz?
- Bu gün "Şamaxı" ilə pis oynamadıq. Əsas odu, məğlub olmadan evə yollanırıq. Qarşıdakı 5 oyunda bundan da yaxşı oynayıb uğurlu nəticələr qazanmaq istəyirik.

- Elitada yerinizi böyük ölçüdə qorumusuz. Qarşıda "Turan Tovuz"u keçib çempionatı 6-cı yerdə tamamlamaq hədəfi varmı?
- Hər bir komanda rəhbərliyi və məşqçiləri daha yaxşı nəticələt əldə edərək mükafatçılar sırasında olmaq istəyər. Amma hazırda əsas məqsədimiz elitada yerimizi qorumaqdı, intriqa davam edir. 6-7-ci yerdə olmaq hazırda o qədər də rol oynamır. Qarşıdakı 5 turda özümüz daxil bütün komandalara uğurlar arzu edirəm.

- İkinci "5-lik" komandalarının baş məşqçiləri və futbol mütəxəssisləri elitanı heç bir klubun tərk etməməsini, əvəzində 1-ci diviziondan daha 2 təmsilçinin gətirilməsini istəyir. Siz necə düşünürsüz?
- Bu gün ikinci "5-lik" təmsilçilərinə baxsaq, hər biri köklü komandalardı. Ona görə heç bir klubun elitanı tərk etməsini istəmirəm. Mənim düşüncəmə görə növbəti mövsümdən 12 komandalı çempionatın olması daha yaxşı olardı. Elitada 12 klub olduqdan sonra idman prinsiplərinin tətbiq edilməsi məqsədəuyğundu.

- Yığmamızın sabiq futbolçusu kimi ölkənin əsas komandasından AÇ-2024-də uğursuz start gözləyirdiz?
- Bəli, gözləyirdim. Çünki millimizin son 5 oyundakı qələbələri həddən artıq şişirdilib gözdən pərdə asıldı. Millətlər liqasındakı qələbələr vacib deyildi. Çünki rəqiblərimizdən Qazaxıstan qrup liderliyini təmin etmişdi. Qalan 3 oyun yoldaşlıq görüşləriydi. Avstriya və İsveçlə oyunlar göstərdi ki, 5 oyunluq qələbə seriyası boş şeydi və yığma seçmə mərhələyə hazır deyil. Mən Canni De Byazinin məşqçiliyinə kölgə salmıram. Savadlı mütəxəssisidi, amma onun yeri Azərbaycan deyil. O burda nə bir uğur qazanasıdı, nə də yığmamızı inkişafa aparasıdı.

- Yəni, italiyalı getməlidi?
- Bəli. Mən De Byazinin ilk təyinatından ona qarşı olmuşam. Ümumiyyətlə, yığmada əcnəbi baş məşqçilərə şans verilməsinin tərəfdarı deyiləm. Əcnəbi məşqçilərə o qədər pullar tökməkdənsə, daha münasib məvaciblə yerli məşqçilərə şans verilməli, qalan pul da çempionatda komanların sayının artırılmasına sərf olunmalıdı. Son 2 oyundan sonra De Byazi yola salınmalıydı. Yığmamızın "sükanı arxasında" yerli mütəxəssislər dayanmalıdı.

- Ölkənin əsas komandasının baş məşqçi postuna siz yaşda, yoxsa daha gənc məşqçi təyin olunmalıdı?
- Fərq etməz. Kifayət qədər savadlı, bacarıqlı və özünü yaxşı tərəfdən göstərən məşqçilərimiz var. Bir həqiqəti qəbul etməliiyik ki, yaxın illərdə onsuz da millimizdən böyük uğurlar gözləmək xəyaldı. Amma ən azı yerli məşqçilərlə indikindən daha yaxşı çıxış edib, müəyyən inkişafa nail olmaq olar.

ABDULLA İSMAYILOĞLU