Türkiyə Futbol Federasiyasının nəzdində fəaliyyət göstərən Hakimlər Komitəsi son qərarı ilə diqqət çəkib.

"Football-plus.az" xəbər verir ki, belə ki, komitə son turda hakimlərin performansını və VAR danışıqlarını incələdikdən sonra 4 hakimi qeyri-müəyyən müddətə cəzalandırıb. Bu haqda komitədən futbol ictimaiyyətinə rəsmi şəkildə açıqlama verilməsi maraq doğurub. Çünki buna qədər də zəif performans göstərən hakimlərin bir neçə həftəliyə cəzalandırılmasına dəfələrlə rast gəlinmişdi. Amma heç vaxt rəsmi açıqlama verilmirdi. Görünür, bu, 3 ay öncə komitənin başına keçən Lalə Ortanın gətirdiyi yenilikdi. Federasiya cezalanan hakimlərin adlarını açıqlamasa da, türkiyəli həmkarlarımız onların kim olduğunu müəyyənləşdirə bilib. Söhbət Arda Kardeşler, Yiğit Arslan, Alpər Çətin və Sarpər Barış Sakadan gedir. Ötən həftəiçi baş tutan 30-cu turun oyunlarından sonra ''İstanbulspor'' ilə ''Konyaspor'' hakimlikdən ciddi şikayətlənmişdi. Sözügedən 4 ədalət təmsilçisi də məhz bu iki klubun oyunlarında baş və VAR hakimləri olmuşdu. Onlar ikinci bir qərara qədər faktiki olaraq hakimlikdən kənarlaşdırılıblar.

Qeyd edək ki, Lalə Orta HK tarixinin ilk xanım prezidentidi. Komitə mövsümə Səbri Çəlikin başqanlığı altında başlasa da, onun istefasından sonra bu vəzifəyə yanvarın 29-da Lalə Orta keçmişdi. Sabiq hakim olan bu xanımın fəaliyyətindən heç də bütün klublar razı deyil. Son dönəmlərdə ''Qalatasaray'' da daxil olmaqla bir çox klub Ortanı istefaya dəvət edib.