Öz hakimlərinə qənim kəsilən və aralarında Cüneyt Çakırın da olduğu 12 ismi faktiki olaraq hakimlikdən kənarlaşdıran Türkiyə Hakimlər Komitəsinin bu absurd qərarının əks-sədası davam edir.

Məlum olub ki, UEFA gələn həftə AL-in 1/8 finalının cavab oyunu çərçivəsində keçiriləcək ''Vest Hem'' - ''Sevilya'' qarşılaşmasına məhz Çakırı təyin edibmiş. Amma Türkiyə hakimliyində yaşanan son olayların ardından UEFA bu matçı Çakırdan alıb!

Bundan başqa hakimlikdən silinməyən və federasiyanın əməkdaşlığı davam etdirmək niyyətində olduğu ədalət təmsilçilərinin son qərara etirazı davam edir. Mete Kalkavanın hakimlikdən getməsi, eləcə də Cüneyt Çakırın köməkçiləri Bahattin Duranla Tarık Onqunun psixoloji durumlarını əsas gətirərək mövsümün sonuna qədər oyunlara təyinat almaq istəməməsinin ardından daha 2 hakim federasiyaya müraciət edib. Söhbət Xəlil Umut Melər və Arda Kardeşlerdən gedir. Melər ən son ''Mançester Siti'' - ''Sportinq'' oyununda əsas, Kardeşler isə 4-cü hakim idi. Onlar bu həftə superliqa oyunlarına təyinat almaq istəmədiklərini deyiblər. Amma hakim çatışmazlığı yaşandığından federasiya prezidenti Nihat Özdəmir hər iki ədalət təmsilçisi ilə görüşərək onları fikrindən daşındırmağa çalışıb və qismən istəyinə çatıb. Melər və Kardeşler VAR hakimi olmağa razılıq veriblər. Melər bu gün oynanılacaq ''Hatayspor'' ''Fatih Karagümrük'' matçının VAR hakimi olacaq. Kardeşler isə sabahkı oyunlardan birində bu funksiyanı icra edəcək.