''Mən hakim təyinatlarına qarışmıram. Bir hesablama sistemi var. Bu sistem sayəsində təyinatlar kompüter vasitəsilə müxtəlif parametrlərə görə həyata keçirilir. Daha bir neçə ölkədə belə sistemdən istifadə olunur. Cüneyt Çakır dünyanın ən yaxşı, sayılıb-seçilən hakimlərindən biri idi. Belə təcrübəli ismi itirməyimiz heç yaxşı olmadı. Amma digər tərəfdən, sonrakı nəsli yetişdirməyə, yeni Cüneyt Çakırlar tapmağa çalışmalıyıq. Burda VAR sistemi yaxşı işləyir. Türkiyədə VAR sistemi səviyyəlidi və eynilə Avropadakı kimidi. VAR sistemi qərarların doğruluq səviyyəsini artırdı. Hakim kobud bir səhvə yol verməyibsə, VAR-ın işə qarışmasını istəmirik. Başa düşürəm ki, futbolda heç kim uduzmaq istəmir. Uduzan tərəf bəzən hisslərə qapılaraq hakimi günahlandırmağa başlayır. Avropada da belə şeylər olur. Amma açığı, Türkiyədəki qədər klub prezidentlərinin və baş məşqçilərin hakimləri günahlandırmasına başqa yerdə rast gəlməmişəm. Prezidentlər matçlardan öncə hakimləri təzyiq altına salmağa çalışır. Bunun hakimlərə heç bir faydası dəymir. Sadəcə, futbolçu səhv etdiyi kimi hakim də səhv edə bilir. Öz ədalət təmsilçilərinizin qədrini bilin. Məsələn, Cüneyt Çakır kimi hakim neçə ildən bir yetişir? Hakimlərin də ailələri, uşaqları var. Onlar da bu durumdan əziyyət çəkir. Türkiyədə futbola marağın hədsiz dərəcədə böyük olduğunu başa düşürəm. Amma hər şeyin bir çərçivəsi olmalıdı. Baş məşqçilərin ehtiyat zonada az qala hər dəqiqə hakimlərə etiraz bildirməsi yaxşı hal deyil. Əcnəbi hakimin dəvət olunması mövzusu barədə nə düşünürəm? Məncə, əcnəbi hakimlərin Türkiyə hakimliyinə bir faydası dəyməyəcək. Belə şeylər daha öncə Şotlandiya və İngiltərə də gündəmə gətirilmişdi. Həmin vaxt da mən etirazımı bildirərək buna qarşı çıxmışdım. Yerli hakimlər derbilərdəki atmosferə gözəl bələddi. Onların hamısı derbini idarə etmək istəyir. Əcnəbi hakim birdən-birə bu atmosferin içinə düşsə və buna hazırlıqlı olmasa, bu, istənilən effekti verməyəcək. Türkiyədə yetərli səviyyədə hakimlər var. Nə vaxtsa bura əcnəbilərin gətirilib-gətirilməyəcəyini bilmirəm. Amma şəxsi fikrim belədi ki, türkiyəli hakimlər çox səviyyəlidi”.