TFF VAR-a əcnəbi hakimlər gətirəcək!

Hakimlik uzun illər olduğu kimi bu mövsüm də Türkiyə futbolunun ən problemli yeridi.

Şaiyələrə inansaq, Türkiyə Futbol Federasiyası nəhayət bu problemi həll etmək üçün radikal addım atmağa çalışır. Söhbət VAR-a əcnəbi hakimlərin gətirilməsindən gedir. Çünki mövsümün heç yarısı belə bitmədiyi halda VAR-dan narazılıq zirvə nöqtəsinə çatıb. Ötən tur ''Qalatasaray'' – ''Alanyaspor'' oyununda yaşanan hakim səhvlərindən sonra bu məsələ gündəmdən düşmür. Tək ''Qalatasaray'' yox, ''Beşiktaş'', ''İstanbulspor'', ''Girəsunspor'', ''Ümraniyəspor'', ''Ankaragücü'' və 1-ci liqa klubları da bu mövsüm VAR-dan çox şikayət edib.

Bilindiyi kimi bu mövsüm TFF-nin qərarı ilə əsas hakimlərlə VAR hakimləri ayrılıb. Yəni VAR-a cavabdehlik daşıyan konkret 11 hakim var. Amma onların sayı az olduğundan bir hakimə bəzən bir həftədə 2 oyun düşür. Bu da onları psixoloji cəhətdən yorur. Hər halda qardaş ölkə futbolunda məhz bu cür fikir formalaşıb. Federasiya artıq VAR-a əcnəbi hakimlərin gətirilməsinə məsələsinə start verib. Qurum UEFA-ya bağlı ölkələrdə VAR sertifikatı olan hakimlərin köməyindən faydalanmaq niyyətindədi. Amma bu yeniliyin hansı turdan tətbiq olunacağı bilinmir. Gələn həftəsonu bizi ''Qalatasaray'' – ''Beşiktaş'' derbisi gözləyir…