“Turan Tovuz” ölkə kubokunun ilk yarımfinal oyununda “Neftçi”yə qalib gəldi.

Bu da o deməkdi ki, bölgə təmsilçisi finala doğru böyük addım atıb. Premyer-liqanın debütantı həlledici görüşə vəsiqə qazana bilsə, həm Ayxan Abbasov, həm də özü üçün böyük uğur olacaq. “Turan Tovuz” bununla həm də finaldakı rəqibi üzərində böyük psixoloji üstünlük qazanacaq. Fərqi yoxdu, rəqibi kim olacaq – “Qəbələ”, yoxsa “Səbail”. “Neftçi”ni üstələyən komanda bu rəqiblərin hər ikisiylə dueldən qalib ayrıla bilər. Hadisələrin indiki axarı “qırmızı-qaralar”ın finalın iştirakçılarından biri olacağından xəbər verir. “Turan Tovuz” da Elmar Baxşıyevin komandasına qarşı bu mövsüm keçirdiyi üç görüşün ikisində uduzmayıb. Yeganə məğlubiyyət açılış turuna təsadüf edib ki, onu da start həyəcanının ayağına yazmaq olar.

Sözümün canı odu ki, qərb təmsilçisi debüt mövsümündə tarixi uğura imza atmaq, təxminən 30 il əvvəl olduğu kimi UEFA-nın bayrağı altında keçirilən turnirin iştirakçısına çevrilmək üçün əla fürsət qazanıb. “Turan Tovuz” bu böyük uğura imza atmaqla həm də mövsümün gedişində kluba sponsorluq etmək üçün sinəsini irəli verən “Hünər Qrup”un üzünü ağ etmiş olacaq. Böyük fədakarlıq və risk edən tikinti şirkəti daha da həvəslənəcək, bununla da Tovuz təmsilçisini gücləndirməyə, bölgənin futbol ənənələrinin bərpası üçün daha böyük işlər görməyə başlayacaq. Məsələnin digər tərəfi də var. “Turan Tovuz”la “Hünər Qrup”un işbirliyinin uğur gətirməsi başqaları üçün də stimul yaradacaq, xoş bir nümunəyə çevriləcək. Bununla da götür-qoy edənlər, qərar verməyə çətinlik çəkənlər də qətiyyətli davranacaq.

Bütün bunlar nikbin proqnozlarımdı. Sözsüz, onların həyata keçməsi gələcəyin işidi. Zaman özü göstərəcək ki, mən haqlıymışam, ya yox. Həm də bunun həyata keçməsi üçün “Turan Tovuz”un başladığı işi sona çatdırması, finala gedən yolda büdrəməməsi və sonda gülən tərəf olması şərtdi. Yazının bu yerində həm proqnozlarımı saxlayım, həm də nikbinliyimi. Qismət olsa, zamanı gələndə bu mövzunu davam etdirərik. İndi “Turan Tovuz”un gücündən və Ayxan Abbasovun qərb bölgəsindəki işindən bəhs edək. Zaman-zaman onu tənqid edirik. Bütün bunlar ona görədi ki, Tovuzda ondan çox şey gözlənildiyindən, həmçinin özünün iddialarından xəbərdarıq. Onun “Sumqayıt”la oyundan sonra klub prezidenti Riad Rəfiyevə mesaj göndərməsi, azarkeşlərdən incikliyini dilə gətirməsi sıradan olay deyildi. Hiss olunurdu ki, Sumqayıtdan incik ayrılıb, ürəyinin dərinliklərində onu incidənlərdən qisas almaq həvəsi bəsləyir. Haqsız da deyil. Elə yazılarımda da bu məqamı vurğulamışam. Əminliklə bildirmişəm ki, “Sumqayıt”ın uğursuz nəticələrində heç də əsas rol Abbasovun olmayıb, komanda belaruslu Aleksey Baqa ilə daha dərin böhran yaşamaqla haqlı olduğumuzu göstərdi.

Bu mənada “Turan Tovuz”un baş məşqçisi kimi tutduğu post, qərb klubunda ona etimad göstərilməsi Ayxan bəy üçün də böyük şansdı. Gənc mütəxəssis işiylə isbat etməlidi ki, məşqçi kimi potensialı var və Riad Rəfiyev ona qarşı haqsızlıq edib. “Turan Tovuz”un mövsümə uğurlu start verməsi də bunun xəbərçisi idi. Startdakı 5 turun dördündə uduzmayıb, 10 xal toplamağı bacaran komanda çox keçmədi ki, 6-cı pillədə möhkəmləndi. Düzdü, qərblilər ilk üç yer uğrunda mübarizəyə ciddi müdaxilə etməyi bacarmırdı. Bununla belə, Abbasovun çalışdırdığı kollektiv aşkar autsayderlərdən də fərqlənir, özünəməxsus dəst-xətti ilə seçilirdi. Elə nə oldusa, bundan sonra oldu. Həm 6-cı pillənin verdiyi rahatlıq, həm də komanda haqda deyilən xoş sözlər Ayxan bəyi şirin yuxuya verdi. İş o yerə gəlib çıxdı ki, yeni sponsorun gəlişini ardıcıl üç qələbə ilə bayram edən, azarkeşlərini sevindirən “Turan Tovuz” sonrakı 7 turda qələbəyə həsrət qaldı. Qəbələdə “Kəpəz”ə yenilginin fəsadı daha ağır oldu. İndi 7-ci sıradakı gəncəlilərlə arada cəmi 1 xal var. Deməli, hadisələrin belə axarı davam etsə, “Turan Tovuz” daha aşağı düşər, özü üçü “isitdiyi” pilləni əldən verə bilər. Bu acınacaqlı mənzərənin tənqidləri, azarkeşlərin “istefa” çağırışlarını da özüylə gətirməsində təəccüblü heç nə yoxdu.

Amma “Neftçi” üzərindəki qələbə, kubokun finalına doğru atılan önəmli addım dönüş nöqtəsinə çevrilə bilər. Bu qələbə həm də onu göstərdi ki, Ayxan bəyin tənqidçiləri haqlı imiş. Tovuz təmsilçisinin potensialı daha artığına imkan verir. Sadəcə, məşqçi komandanın gücünü düzgün qiymətləndirməli, futbolçuları ayrı-ayrı rəqiblərə qarşı kökləməyi bacarmalıdı. Komanda uduzubsa, baş məşqçinin də günahı var. Bir sözlə, Ayxan Abbasov nə qüsursuzdu, nə də toxunulmaz.

AMAL