“Huner Group”un rəhbəri: “Neftçi" kimi güclü komandaya qarşı əzmkar oyun göstərmək bizi əlavə xoşbəxt etdi”

Ölkə kubokunun yarımfinalının ilk görüşündə “Turan Tovuz”un “Neftçi” üzərində qələbəsinə ən çox sevinənlərdən biri də “boz qurd”ların sponsoru, “Huner Group”un rəhbəri Ehtiram Quliyev idi.

“Football-plus.az” xəbər verir ki, qarşılaşmanı həyəcanla izləyən iş adamı oyundan sonra əməkdaşımızın suallarını cavablandırıb.

- Öncə matçla bağlı fikirlərinizi bölüşərdiz...
- Oyunumuz çox gözəl alındı. Burda xüsusilə futbolçularımızın böyük əməyi oldu. Və ən böyük əmək azarkeşlərimizin oldu. Komandanı sonadək dəstəklədilər. Buna görə çox xoşbəxtəm.

- Bizdə olan məlumata görə, “Kəpəz”ə məğlubiyyətdən sonra komanda ilə iclas keçirmisiz...
- Bizim komanda ilə həmişə görüşlərimiz, oyunlardan əvvəl müzakirələrimiz olur. Standart bir görüş idi.

- Etiraf edək ki, çox stresli oyun oldu.
- Bəli, biz də elə düşünürük. "Neftçi" çox böyük komandadı. Qat-qat güclüdü. Belə güclü komandaya qarşı əzmkar oyun göstərmək bizi əlavə xoşbəxt etdi.

- Cavab qarşılaşmasından nə gözləyirsiz?
- Etiraf etmək lazımdı ki, şansımız çox az idi. Hələ də az olaraq qalır. Mərhələnin favoriti “Neftçi”di. Amma azarkeşlərimizi sevindirdiyimizə, bu şəhərə futbol əhval-ruhiyyəsini, bayramını gətirdiyimizə görə xoşbəxtik.

- Bu oyuna görə yaxşı stimul olacaq?
- Yəqin ki, olacaq.

- "Qəbələ" akademiyansının yeni sponsoru olan şirkətin rəhbəri Aslan bəy açıqlamasında sponsorluq müqaviləsinin bağlanmasında sizin böyük rolunuzun olduğunu bildirmişdi. "Kəpəz"lə "Şamaxı" üçün də iş adamlarını dəvət etmək fikriniz var?

- Aslan müəllim dostunuzdu. Müzakirələrimiz oldu. Tək futbola yox, eyni zamanda şirkətlərə müsbət təsirləri barədə danışıqlar oldu. Ümid edirik ki, yaxın zamanda "Kəpəz"lə "Şamaxı" klublarına da sponsor tapılar.

RƏŞAD