AFFA İcraiyyə Komitəsinin aprelin 13-də keçirilən iclasında Canni de Byazidən hesabat tələb olundu.

Daha sonra qərara alındı ki, italiyalı mütəxəssislə yola davam edilsin. Halbuki əksəriyyət AÇ-2024-ün seçmə mərhələsinin F qrupunda Avstriya (1:4) və İsveçə (0:5) məğlubiyyətlərə görə onunla yolların ayrılacağını gözləyirdi. Lakin bu baş vermədi. Görəsən, De Byazi özünü necə müdafiə edib? İcraiyyə Komitəsinin iclasında nələr baş verib?

"Football-plus.az" xəbər verir ki, bu və başqa suallara aydınlıq gətirmək üçün AFFA-nın vitse-prezidenti və İcraiyyə Komitəsinin üzvü Vaqif Sadıqovla əlaqə saxladıq.

- De Byazi ilə nə üçün yola davam edildi?
- Belə qərar qəbul olundu ki, hazırkı vəziyyətdə məşqçi dəyişmək məqsədəuyğun sayılmır. Amma çox vaxt aparan müzakirə oldu. İki saatdan artıq iclas keçirdik. De Byaziyə sərt iradlar bildirildi. Ona İcraiyyə Komitəsinin üzvləri tərəfindən suallar ünvanlandı. Əsasən bildirdik ki, belə oyun və nəticələr qəbulolunmazdı. Bu vəziyyətdən çıxmağın lazım olduğu qeyd olundu. Komandanın indiki durumunu mümkün qədər düzəltməsi istənildi. De Byazi hesabatı təqdim edəndən sonra öz aramızda müzakirə etdik. Bu çox vaxt apardı. Sonda onun postunda qalması haqda qərar qəbul olundu. İki aydan sonra rəsmi oyun var. Estoniya ilə matçdan öncə məşqçi dəyişikliyi etmək məqsədəuyğun sayılmadı.

- De Byazi hesabatında nələri qeyd etdi ki, buna uyğun da vəzifəsində qaldı?
- Mən bunu deyə bilmərəm. Ailənin içində olan söhbətləri ictimailəşdirmək olmaz. De Byazi ən sərt şəkildə tənqid olundu. Əsas fikrimiz o oldu ki, milli komanda son iki matça tam hazır deyildi. Bunun birbaşa məsuliyyətini daşıyan şəxs də baş məşqçidi.

- Deyilənə görə, üç yerli mütəxəssisin namizədliyi irəli sürülüb. Bununla bağlı nə deyə bilərsiz?
- Bu məsələ ilə bağlı danışa bilmərəm. Sadəcə, çox maraqlı və gələcəyə ümid bəsləyəcəyimiz iclas keçdi. Bu haqda, ümumiyyətlə, düşünmək doğru deyil. Çünki qarşıda oyunlarımız var. Belə məsələlər futbolçulara da, yığmaya da təsir edə bilər.

- Media qurumlarından biri qeyd edib ki, Canni de Byaziyə əvvəlcə təzminatının yarısı təklif olunub ki, özü yığmadan getsin. Lakin o, bu məsələ ilə razılaşmadığı üçün yola davam etmək məcburiyyəti yaranıb. Ümumiyyətlə, onun təzminat məbləği çox böyükdü?
- Xeyr, belə söhbət olmayıb. Səmimi sözümdü. Təzminat söhbəti, ümumiyyətlə, olmayıb. Heç bir məbləğ barədə danışılmayıb. Getsəydi, hansısa təzminat ödənilməliydi. Amma onun məbləği barədə danışıq olmadı. Ümumiyyətlə, bununla bağlı müzakirə yaşanmadı. Sadəcə, qərar qəbul olundu ki, yaranmış vəziyyətə uyğun köklü dəyişiklik etmək məqsədəuyğun deyil. Kim nə yazıbsa, yalandı.

- Son qərar ürəyinizcə oldu, ya yox?
- Yenə deyirəm, yaranmış vəziyyətdən asılı olaraq bu qərar verildi. Bundan başqa nəsə deyə bilmərəm.

İLKİN SULTANLI