Misli premyer-liqasında 22-ci turun oyunları keçirilir.

"Səbail" "Zirə"ni qəbul edib - 2:0. Görüşdən sonra meydan sahiblərinin çalışdırıcısı Şahin Diniyevin mətbuat konfransı keçirilib. Sizi mütəxəssisin fikirləri ilə tanış edirik:

"Türkiyədə baş vermiş hadisəyə görə klub adından, öz adımdan başsağlığı verirəm. Allah ölənlərə rəhmət etsin. Böyük acıdı. Şəxsən özüm türk televiziyalarına baxıram, dağıntıların altından hər uşaq çıxanda sevinirəm. Futbol ikinci dərəcəyə çevrilib. Oyun istədiyimiz ssenaridə getdi. "Zirə" bu gün ən yaxşı futbol oynayan üç komandadan biridi. Onlar nə etdiyini bilirlər. Bizim üçün çox çətin idi. Bizə zaman lazım olduğunu demişdim. Hələlik başlanğıcdı. Çatışmayan cəhətlərimiz var. Layiqli qələbə qazandıq. Sona qədər mübarizə apardıq. Hər bir futbolçu oyun intizamına əməl etdi. Mübarizə aparanda nəticə gələcək. Bu matçda bizə xallar lazım idi. Düşdüyümüz yer bizi sıxır. Sakitləşmək olmaz. Ümid edirəm ki, gələcək oyunlar daha yaxşı olacaq".

- Növbəti tur "Neftçi" ilə qarşılaşacaqsız. Çempionatın qrafiki sizi narahat etmir?
- Onsuz da oynamalıyıq. "Sabah"la matçda fərdi səhvlərdən qollar buraxdıq. İkinci hissədə göstərdiyimiz oyun ümid verdi. Komanda artırmalıdı. "Qarabağ", "Sabah", Zirə" ən yaxşı futbol oynayan komandalardı. "Neftçi" pik formasına çatmayıb. Asan olmayacaq. Uğurlu nəticə üçün meydana çıxacağıq. Hər oyun bizim üçün finaldı. Rahatlaşmağa, dayanmağa vaxtımız yoxdu.

- "Səbail" ilk dəfə "Zirə"ni məğlub etdi. Bu, sizin üçün önəm kəsb edirdi?
- Əhəmiyyəti yoxdu. Hansı komanda ilə oynasan, üç xal verəcəklər. Rəşad yaxşı işlər görür. Onlar istədiklərini həyata keçirə bilmədilər. Burda futbolçularımın əməyi var. Heç kimlər pinsipiallığımız yoxdu.

- "Zirə"ni necə incələdiz?
- Yaxşı olanda deyirik yaxşı analiz etmişik. Pis olanda demirik pis analiz etmişdik. Bu gün Rəşadı yox, "Zirə"ni təhlil etmişdik. O, komandanın oyun üslubunu verən insandı. Çantakias "Zirə"də böyük işlər görür. Onun olmaması da bizim üçün üstünlük idi. Hamidu Keytanı bağlamaq çox çətin idi, amma bacardıq. Rəhim Sadıxovun topu qəbul etməməsinə çalışırdıq, etdik. Futbol kiçik detallardan ibarətdi. Deməzdim ki, analizi çox yaxşı etdik. Alınmaya da bilərdi. Rəşad yaxşı baş məşqçidi, öz oyun üslubu, futbola baxışı var. Məncə, böyük nəticələri qarşıdadı.

- Klub rəsmiləriniz hakimi söyürdü. Bu barədə fikriniz necədi?
- Futbol emosiyalar oyunudu. Hər birimiz bəzən özümüzü itiririk.

- İki ev matçından yüz faizli nəticə ilə ayrıldız. Evdəki və səfərdəki "Səbail" arasında hansı fərq var?
- Səfərdə elə də təzyiq altında oynamırıq. Hər oyunda artım var. Çox şeyləri demək istəmirik. Bu gün çox qaçdıq. Səfərdə və ya evdə oynamağımızdan asılı olmayaraq oyundan-oyuna artırırıq.

- "Səbail" artıq 8-ci pillədəyə yüksəldi. Bu, sizə motivasiyadı?
- Sonuncu pillədə ola-ola oyuna çıxmaq çətindi. Transfer etmək də asan deyil. Zərgər dəqiqliyi ilə transfer etməliyik. Üç oyunda bir dəfə rəhbərlik deməyib ki, pis oynadız. Onlar hər şeyi anlayır, bilirlər ki, zamana ehtiyac var. Xallar yaxındı, hər bir oyun sonuncudu. Hələ çox çalışmalıyıq. Bu, o demək deyil ki, artıq son pillələrdən çıxdıq. Rəqiblərdən aralanmaq çox çətindi.