Cavid İmamverdiyev: “Çox istərdim ki, “Sabah”dan təklif gəlsin”
O, birvaxtlar ən yaxşı yerli futbolçularından sayılırdı. “Karvan”, “Neftçi”, “Sumqayıt”, “Sabah”, “Keşlə”, “Kəpəz” kimi klublarda çıxış edib. Türkiyədə də oynamaq imkanı qazanıb. “Elazığspor”un uğurları üçün tər töküb. Yəqin söhbətin Cavid İmamverdiyevdən getdiyini bildiz.
Şəmkirdə doğulan futbolçu hazırda Region Liqasında - “Marxal-Şəki”nin heyətində çıxış edir. Bu çempionatda top qovmasının səbəbi və gələcək karyerası haqda açıqlama aldıq:
“Marxal-Şəki”nin təsisçisi Elgün Hüseynovla çoxdan dostuq. O, məndən belə xahiş etdi, mən də sözünü yerə salmaq istəmədim. Bu səbəbdən də Region Liqasında oynayıram. Pley-off matçlarında da onlara kömək edəcəm. Mənim üçün xoş addımdı. Azərbaycanın bir bölgəsində futbol klubu formalaşdırmaq istəyirlər. Nə xoş ki, mən də bu işin bir parçası oluram. Bundan sonra isə karyeramı bitirəcəm. Tək düşüncəm məşqçiliklə bağlıdı. İnşallah, tezliklə kurslara başlayacam. Ümid edirəm ki, məşqçiliyin bütün sirlərini mənimsəyə biləcəm”.
Bir müddət öncə xəbər yayılmışdı ki, Cavid “Sabah”ın aşağı yaş qrupu üzrə komandalarının birində məşqçi kimi fəaliyyətə başlayıb. Görəsən, bu həqiqətdi? Yığmanın sabiq üzvü məsələ ilə bağlı bunları söylədi:
“Ortada rəsmi heç nə yoxdu. Amma çox istərdim ki, “Sabah”dan təklif gəlsin. Biliyimi azyaşlı futbolçularla bölüşməyi özümə şərəf bilərəm”.
İLKİN SULTANLI
Digər xəbərlər
