İcraiyyə Komitəsinin bu gün keçirilən iclasından sonra komitə üzvü, Futzal Federasiyasının prezidenti Zaur Axundov jurnalistlərin suallarını cavablandırdı.

- Öncə iclasda müzakirə olunan məsələlər barədə məlumat verərdiz.
- Əsas müzakirə mövzusu yığmanın geridə qalan iki oyunu oldu. Məşqçinin hesabatını dinlədik. Biz də fikirlərimizi bildirdik. Və sonda qərar gəldik ki, italyan mütəxəssis işini davam etdirsin. Təbii ki, məşqçi də son iki oyundan nəticə çıxarmalıdı. Canni de Byazi ilə bu tsklin sonuna qədər müqavilə var və müddət başa çatana kimi postunda qalacaq.

- Toplantıdan öncə ictimaiyyət arasında gəzən öz-söhbətlərə görə, yerli məşqçilərin də namizədliyi nəzərdən keçiriləcək...
- Gündəmdə belə məsələ olmadı.
-
Başqa nələr müzakirə olundu?
- Futzalla bağlı da müzakiələr getdi. Bildiyiniz kimi, qarşıda dünya çempionatının elit mərhələsi olacaq. Bundan başqa, uşaq futbolu, klubların tərkibində fəaliyyət göstərən akademiyalarla bağlı fikir mübadiləsi apardıq.

- Futzaldan söz düşmüşkən, ötən ay U-19 millisi Bosniya və Hersoqovinada təşkil olunan seçmə mərhələdə fiaskoya uğradı. Uğursuzluğa münasibət bildirən əsas millinin baş məşqçisi Joze Alesio Da Silva U-21 yığmasının təşkil olunması ilə bağlı sizə müraciət etdiyini bildirib. Onun fikirncə, çempionatda komanda sayı az olduğundan U-19 həddini aşan gənc futzalçılar klubsuz qalır ki, bu da onların inkişafına mane olur. Siz necə düşünürsüz?
- U-19-un Bosniya və Hersoqovinadakı çıxışı hamımızı məyus etdi. Bununla bağlı hesabat hazırlanır. Komandanın baş məşqçisi ilə görüşümüz olacaq. Gənclərin inkişafı vacibdi. Əsas yığmanın oyunçularının da yaşı keçir. Əksəriyyəti artıq 30 yaşın üstündədi. Bizim üçün prioritet U-17 və U-19-du. Alesio belə təkliflə çıxış edib. Biz ona baxıb AFFA rəhbərliyi ilə müzakirə etdikdən sonra qərar verəcəyik.

- Bu gün yüksək liqada cəmi 6 komanda çıxış edir. Oyunlarda qeydə alınan nəticələrdən də görünür ki, səviyyə çox aşağıdı. Növbəti mövsüm üçün hansı planlarınız var?
- Yeni mövsümdə bölgələrdə də futzal komandalarının olmasını istəyirik. Regionlarda futzalın inkişafı üçün lazımi şərait var. Bugünkü toplantıda da bu məsələni müzakirə etdik. İcraiyyə Komitəsinin növbəti iclasında konkret təkliflərlə çıxış edəcəm. Komanda sayını 8 və ya 10-a çatdırmaq fikrimiz var. Bunlardan üç və ya dördünün bölgə təmsilçisi olmasına çalışırıq.

- Son açıqlamalarınızın birində böyük futbolda olduğu kimi, futzal komandalarına da müəyyən vəsaitin ayrılacağını bildirmişdiz. Bu məsələ gündəmdədi?
- Bu gün də o təkliflə çıxış etdim. AFFA prezidenti baş katibə təklif hazırlamağa göstəriş verdi.Ümid edirəm ki, yeni mövsümdən futzal çempionatında çıxış edən klublara da müəyyən maliyyə ayrılacaq. Onlar da həmin vəsaiti klubun inkişafına xərcləyəcəklər, gənc futzalçıları komandaya cəlb edəcəklər.

- Legioner limiti müzakirə olundu?
- Açığı, qeyd etdiyiniz məsələ bu gün müzakirə olunmadı. Ancaq növbəti iclasda bunu da gündəmə gətirəcəyik. Fikrimcə, legioner məsələsində limit tətbiq olunmalıdı.

- “Araz-Naxçıvan” Avropanın sayılıb-seçilən klublarından biri idi. Ancaq son illərdə mövqeyini əldən verib. Bu nə ilə əlaqədardı?
- Bildiyiniz kimi, “Araz-Naxçıvan” iki dəfə “dördlər finalı”nda oynayıb. Son illərdə nəticələrimiz ürəkaçan deyil. Belə olmasını istəmirdik. Avropada ilk “altılıq”da idik. Bu da bizim səhvimizdi. Böyük futbolda olduğum vaxt futzala lazım olan diqqəti ayıra bilmədim. Yeni mövsümdən komandanı gücləndirmək və yenidən Avropada sözümüzü demək fikrindəyik.

- Ara-sıra Zaur Axundovun yenidən böyük futbola dönəcəyi ilə bağlı sözhbətlər gəzir. Bu məsələyə münasibət bildirməyinizi istərdik.
- Böyük futbola qayıtmaq fikrim yoxdu. Hazırda bütün diqqətimi futzala yönəltmişəm.

RƏŞAD