Çempionlar Liqasının 1/4 finalının ilk oyununda ''Mançester Siti''yə səfərdə 0:3 hesabı ilə uduzaraq yarımfinal şansını möcüzələrə buraxan ''Bavariya''da böyük bir qalmaqal yaşanıb.

"Football-plus.az" xəbər verir ki, matçın ardından Sadio Mane ilə Leroy Sane arasında münaqişə yaşanıb. ''Bild'' nəşrinin məlumatına görə münaqişə o qədər böyüyüb ki, Mane Sanenin sifətinə zərbə endirib və onun dodağını partladıb.

Bu ikili arasında matçın gedişində sözlü münaqişə yaşanmışdı. 83-cü dəqiqədə yaşanan bir epizoddan sonra Mane komanda yoldaşına iradını bildirmişdi. Amma Sanenin bu irada kobud şəkildə cavab verməsi seneqallı ulduzun xoşuna gəlmədiyindən o, məsələni paltardəyişmə otağında bu cür üsulla aydınlaşdırmaq qərarına gəlib. Komanda yoldaşları onları çətinliklə ayırıb.

Deyilənə görə bu olay klubda və digər oyunçular arasında şok effekti verib. Mane onsuz da bu mövsüm ümidləri doğrultmurdu. Zədə üzündən bəzi oyunları qaçıran təcrübəli futbolçu Münhen nəhəngində 27 rəsmi qarşılaşmada cəmi 11 qol vurub.

Bu hadisədən sonra onunla mövsümün sonunda yolların ayrılması ehtimalı bir qədər də artıb. Ona pul cəzası verilməsi də gündəmdədi. Bu, Mane ilə bağlı ilk qalmaqal deyil. Martın sonlarında 1/8 finalın PSJ-yə qarşı cavab matçında (2:0) bu futbolçu cəmi 8 dəqiqə oynamaq şansı qazanmışdı.

Həmin vaxt da ''Bild'' yazmışdı ki, bu durumdan hədsiz dərəcədə narazı olan Mane oyundan sonra komanda yoldaşlarının içində o dönəmdəki baş məşqçi Yulian Naqelsmannın üstünə qışqırmışdı.