Ötən həftəsonu keçirilən Avstraliya “Qran-pri”si yalnız Maks Ferstappenin qələbəsi və ya rekord tamaşaçı sayı ilə yadda qalmayacaq.

“Football-plus.az” xəbər verir ki, iş ondadı ki, cari mövsümün 3-cü mərhələsi təşkilatçılıq baxımından əməlli-başlı uğursuzluğa düçar oldu. Kevin Maqnussenin bolidinin 52-ci mərhələdəki qəzası az qala Böyük Britaniyadan olan fanat Uill Svit üçün fasilə ilə nəticələnəcəkdi. Divara çırpılan “Haas”ın təkər qovşağından qopan parça yüksək sürətlə onun əlinə dəydi. Həmin parça qoruyucu səddin üstündən aşaraq 20 metr uçdu. Melburndakı qalmaqal bununla da bitmədi. Lüis Hemilton sonuncu dövrənin gedişində maşının kokpitindən qoruyucu səddi aşıb trassa yürüyən 7 fanatı gördü. Yeddiqat dünya çempionu dərhal bunu “Mersedes”in mühəndisi Piter Bonninqtona çatdırdı, sonuncu isə stüartları və təşkilat komitəsinin rəsmilərini çağırdı. Xoşbəxtlikdən həmin fanatlardan heç biri ziyan görmədi. Ancaq indi Beynəlxalq Avtomobil Federasiyasına (FIA) və Avstraliya “Qran-pri”sinin təşkilatçılarına yönələn sualların sayı çoxdu.

2017-ci ilin təcrübəsindən dərs çıxarmayıblar
“Formula-1” yarışlarının 6 il əvvəl Melburnda keçirilən mərhələsində artıq oxşar insident olub. Onda təhlükəsizlik reqlamentindən yaxşı xəbərdar olmayan stüardlardan biri artıq finişə çatan pilotların qapalı parklama yerinə daxil olmasını gözləmədən qoruyucu səddəki qəfəslərdən birini açmışdı. Əllərində bayraqlar və içkilər olan azarkeş kütləsi “Albert-park”dakı trekə axışmışdı. Beynəlxalq Avtomobil Federasiyasının yoxlaması gələcəkdə belə insidentlərin yaşanmasını önləməliydi, ancaq indi belə görünür ki, Avstraliya mərhələsinin təşkilatçıları hələ də stüardlara lazımi təlimi keçməyi öyrənməyiblər. Maqnussenin maşınından uçan parçanın əlini yaraladığı Uill Svit hadisədən sonra müxtəlif media qurumlarına verdiyi açıqlamalarda zarafatla dedi ki, zədəyə, yoxsa sevimli pilotunun mübarizəni dayandırmasına görə daha çox qəzəbləndiyini bilmir. Eyni zamanda həmin azarkeş bildirir ki, sadəcə, bəxti gətirib – təkər qovşağının parçası əks tərəfdən uçsaydı, daha ciddi zədə ala bilərdi. Uill hadisədən sonra tibbi personalın ona yanaşmasını yetərincə udun müddət gözləyib, həkimlər yarasını bir qədər gec tikib. Svit və xanımı tribunada – elə olduqları yerdə qalmağa qərar veriblər. Hər halda, azarkeş durumundan o qədər də narazı deyil. Axı həmin təkər parçası tribunada olan çoxlu uşaqdan birinə də dəyə bilərdi. Svit, sadəcə, təşkilatçıların hərəkətlərindən məyusdu: tibbi yardımı gecikdirmələri azmış kimi, onun əlini “tapan” parçanı suvenir kimi götürməsinə də icazə verməyiblər.

Avstraliya mərhələsinə görə başqası məsuliyyət daşıyacaq
Bazar ertəsi isə bu mərhələnin təşkilatçısı olan “Australian Grand Prix Corporation” şirkətinin rəhbəri Endryu Uestakottun vəzifəsindən istefa verdiyi açıqlanıb. Onun bir gün əvvəl FIA rəsmiləri ilə görüşündə ortaq mövqe belə olub ki, təşkilatçılıqla bağlı bu cür qüsurlara yol verilməsinə dözmək mümkün deyil. Ümumdünya Avtoidman Şurası təşkilatçılara münasibətdə mümkün sanksiyaları da gözdən keçirəcək. Qurumun iclasında azarkeşlərin trassa çıxması və trek boyunca quraşdırılan torun reqlamentə nə dərəcədə uyğun olması da müzakirəyə çıxarılacaq. Axı məhz həmin torun üzərindən keçən parça Sviti yaralayıb. Bununla belə, Avstraliya mərhələsinin təşkilatçısı ilə “Formula-1” arasında yaxınlarda müddəti uzadılan müqavilə 2035-ci ilə qədər qüvvədə olacaq.