İndoneziya gənclər (U-20) arasında dünya çempionatının təşkilatçlılıq hüququnu itirib. Qərarı FİFA verib.

“Football-plus.az” xəbər verir ki, ali futbol qurumunun yaydığı məlumatda Asiya ölkəsinin mayın 20-də 24 komandanın iştirakı ilə start götürməli olan turniri təşkil etməyə hazır olmadığı bildirilib. Buna FİFA-nın prezidenti Canni İnfantino ilə İndoneziya Futbol Federasiyasının (İFF) rəhbəri Erik Tohir arasındakı görüşdən sonra aydınlıq gəlib. Bir neçə gün əvvəl dünya çempionatının püşkatma mərasimi ləğv olunub. Buna səbəb kimi Bali adasının qubernatoru Vayan Kosterin İsrailin nümayəndələrini tədbirə buraxmamaq çağırışı göstərilib. Qeyd edək ki, Fələstini dəstəkləyən İndoneziya ilə İsrail arasında diplomatik münasibətlər mövcud deyil.

Hazırda çətin vəziyyətə düşən FİFA-nın İFF-yə sanksiya verəcəyi və hətta bu ölkənin komandasını DÇ-2026-nın seçmə turnirinə buraxmayacağı haqda iddialar səslənir. Təşkilatçılıq hüququnu isə mundiala vəsiqə qazana bilməyən Argentina üzərinə götürməyə hazırdı.