“Bəli, doğru buyurursuz. Elektron tablolarda, monitorlarda göstərilən işlərin hamısı stadionun dizayneri Orxan Hacıyev tərəfindən hazırlanmışdı. Lakin məlumatın tam olmayan tərəfi də var. Bunu ilk edən azərbaycanlı Orxan Hacıyev deyil. İndiyə kimi stadionumuzda beynəlxalq tədbirlər keçirilib. Söhbət Avropa Oyunları, İslam Həmrəliyi Oyunları, Avropa Liqasının finalı, Avropa çempionatının qrup və 1/4 final mərhələsinin oyunları və “Qarabağ”ın avrokubok görüşlərindən gedir. Həmin vaxtlar görüntülər əməliyyat komitəsi tərəfindən bizə verilib. Bu tədbirlər zamanı elə olurdu ki, nəzarət də bizdə olmurdu. Həmin görüntülər, qollar zamanı səslənən musiqilər əməliyyat komitəsinin yayın otağından idarə olunurdu. Lakin Azərbaycan millisinin Millətlər Liqasındakı oyunları zamanı nümayiş olunan görüntülər AFFA-nın əməkdaşı Xamid Baxşıyev tərəfindən hazırlanırdı. Onun hazırladığı işlər belə UEFA tərəfindən təsdiqlənirdi.

“Qarabağ” – “Qalatasaray” matçı zamanı göstərilənlər isə ilk dəfə stadion tərəfindən hazırlanıb, idarə olunurdu. Bundan öncə kiçik tədbirlər həyata keçirmişik. Bəzi şirkətlər öz tədbirlərini bizim stadionda reallaşdırıb. Həmin məqamlarda öz dizaynlarımızı şirkətlərə təklif etmişik və onlar da bundan yararlanıb. Lakin futbol matçında ilk dəfə belə bir işi təcrübədən keçirdik. Buna görə dizaynerimiz Orxana xüsusi təşəkkür edirəm”.