Daha bir məkan "Neftçi"nin ixtiyarına verilib. Söhbət Bakı Olimpiaya Stadionundan gedir.

Football-plus.az xəbər verir ki, flaqmanın akademiyasının aşağı yaş qrupları ölkənin ən böyük arenasının meydanlarında məşq edir. "Neftçi"yə məxsus kollektivlər ötən həftədən BOS-da hazırlıq keçir. Akademiyanın komandaları həm BOS-da, həm də "Türk Hava Yolları Futbol Mərkəzi"ndə məşq keçir. Maraq üçün bildirək ki, arenanın xidmətindən "Zirə", "Qəbələ", hakimlər və aşağı yaş qrupları üzrə yığmalar da yararlanır.
Görəsən, flaqman bunun üçün BOS-a ödəniş edəcək? “Neftçi” akademiyasının komandalarının burda məşq keçməsi arenaya problem yaratmayacaq? Bu yöndə suallarımızı stadionun mətbuat xidmətinin rəhbəri Fərid Əsədzadəyə ünvanladıq.

- Bizdə olan məlumata görə, “Neftçi”nin akademiyası Bakı Olimpiya Stadionuna köçür. Bununla bağlı nə deyə bilərsiz?
- Bəli, informasiya doğrudu. Həftə ərzində 5 dəfə akademiyanın nəzdində olan iki komanda burda məşq edəcək. Yəni standart şəkildə hansısa yaş qrupları yox, “Neftçi”nin nəzdində olan kollektivlər burda hazırlıq keçəcək. Ötən həftədən etibarən bu proses başlayıb. “Neftçi”nin akademiyasındakı komandalar həm "Türk Hava Yolları Futbol Mərkəzi"ndə, həm də BOS-un ehtiyat meydanlarında məşq keçəcək.

- Deməli, klubla rəsmi müqavilə bağlanıb. Sirr deyilsə, maliyyə şərtləri haqda danışa bilərsiz? Məşqlərə görə “Neftçi” sizə nə qədər ödəyəcək?
- Bəli, müqavilə bağlanıb. Bizim burda tək xeyrimiz Azərbaycan futboluna fayda verməkdi. Yəni ölkə futboluna az da olsa, kömək etmək istəyirik. “Neftçi”nin məqsədi burda futbolçular yetişdirməkdi. Biz də bunda pay sahibi olmaq istəyirik.

- Bilirik ki, BOS-un ehtiyat meydanlarına tələbat böyükdü. “Neftçi” akademiyasındakı komandaların gəlişi sıxlığa səbəb olmayacaq? Bu məsələni necə tənzimləyəcəksiz?
- Bəli, doğrudu. Stadionumuza tələbat böyükdü. Üç təbii örtüklü ehtiyat meydanımız var. Premyer-liqada çıxış edən klublar burdan istifadə edir. Futbol akademiyaları əvvəllər də bizdə məşq edib. Düşünmürəm ki, hansısa problem yaransın. Əməkdaşlarımız qrafiki peşəkar şəkildə böləcək.

- Necə oldu ki, “Neftçi”nin akademiyasındakı komandalar birdən-birə BOS-a gəlmək istədilər?
- Klubun rəhbərliyi bizə müraciət etdi və müsbət qarşılaşdıq. Ötən həftədən etibarən də məşqlərə başlayıblar. Yenə deyirəm, bizim burdan gəlirimiz azərbaycanlı futboluçuların yetişməsinə töhfə verməkdi.

İLKİN SULTANLI