Premyer Liqanın 27-ci turunda “Qarabağ” səfərdə "Sumqayıt"ı darmadağın etdi.

“Football-plus.az” xəbər verir ki, matçdan sonra keçirilən mətbuat konfransında “köhlən atlar”ın çalışdırıcısı Qurban Qurbanov öncə 90 dəqiqə ilə bağlı fikirlərini bölüşdü, ardınca isə mətbuat nümayəndələrinin suallarını cavablandırdı.

- Qeyd etmsiz ki, "Qalatasaray"la matç üçün digər klublardan futbolçu götürə bilərik. Artıq müraciət etmisiz? Hansı mövqelərə futbolçu istəyəcəksiz?
- Hələ müraciət etməmişik. Hesablamalarımıza görə əlimizdə 12 futbolçu qalmalıdı. Ola bilər ki, oyuna 2-3 gün qalmış müraciət edək. Çünki, Benzianın, Diakabinin hazırlığı tam bəlli olacaq. Ayın 19-na kimi komandaya istirahət verdim. Onlar 19-u komanda ilə birlikdə məşq etməlidilər. Hələ ki, fərdi hazırlaşırlar. Konkret olaraq müdafiə xəttində çatışmazlığımız olacaq. Cəmi 3 müdafiəçimiz qalır. Rahil, Kevin və Maksim. Ola bilər ki, 2-3 müdafiəçi üçün klublara müraciət edək. Amma yenə də qarşıdakı məşq proseslərindən çox şey asılı olacaq. Digər mövqelərə də dəvət ola bilər.

- Nəriman Axundzadəyə bu gün müdafiənin cinahında şans verdiz. Onu "Qalatasaray"la matça hazırladığınızı düşünmək olar?
- Yox. Maksim Medvedevin qızdırması var. Ona görə ehtiyatda yox idi. Olsaydı, Nərimanı o mövqedə oynatmazdıq. Nəriman çox bacarıqlı futbolçudu. İstənilən mövqedə minimum tapşırığı yerinə yetirməyə çalışır. Gələcəkdə onu hücümda daha çox görmək istəyərdik.

- 12 futbolçu qalacağını dediz. Maksim Medvedevlə Qara Qarayev də bu siyahıya daxildi?
- Düzü, bəli. Sabah bəlkə də nəsə ola bilər. Onlar da milliyə getsə, 10 nəfər qalacağıq.

- Hücum xəttinin futbolçuları da milli komandaya gedəcək. Mərkəz hücumçusu kimi nəzərdə tutursuz?
- Müasir futbolda mərkəz hücumçusuz daha çox oynayırlar. Bu mövqedə oynaya biləcək futbolçularımız var. Lazım olsa, bunun üçün də müraciət edəcəyik.

- Ramil Şeydayevlə Musa Qurbanlı arasında bombardirlik yarışında gərgin mübarizə gedir. Hazırda Musanın uzun illərdən sonra Nikolas Kanalesin 26 qolluq nəticəsini yaxşılaşdırmaq şansı var. Növbəti qarşılaşmalarda penalti vurmaq hüququ qazansaz, onu Musanın vurmasını istərdiz?
- Yox. Bir dəfə vermişəm və nəticəsini də görmüşəm (gülür). Söz verdim ki, bir də belə addım atmayacam.

- "Qalatasaray"la matçın milli oyunları üçün nəzərədə tutulan pəncərədə olmasının səbəbi nədi? Seçim imkanı olsaydı, başqa tarixdə keçirilməsini istərdiz?
- Şərtlər hər ikimiz üçün eynidi. Onların da bəzi oyunçuları millilərə gedəcək. Yığmaya dəvət almayanlar daha adlı-sanlıdılar. Azarkeşlər onları görəcəklər. Biz tərəfdən ciddi problem görmürəm. Əlbəttə istəyərdim ki, bütün futbolçular olsun. Bu oyunun məqsədi məlumdu. Bu səbəbdən istənilən vaxt biz “yox” deməzdik. Hətta ən sıx qrafikdə belə oynamağa razılaşardıq. Matçdan əldə olunan gəlir zəlzələ bölgəsinə göndəriləcək. "Qalatasaray" kimi böyük klubların həmişə boş vaxtı olmur. Bunu da nəzərə almalıyıq. Yoldaşlıq görüşü olduğuna görə oyuna rahat yanaşacaqlar. Bu arada olması həm klublar, həm futbolçular üçün daha faydalı olacaq.

- "Qarabağ" - "Qalatasaray" matçında nəticə sizin üçün önəmli olacaq?
- Deməzdim ki, nəticə önəmli olacaq. Amma biz yaxşı oyun göstərmək istəyirik. Futbolu azarkeşlər üçün oynayırıq. Bəlkə də stadionun yarısı "Qarabağ", yarışı "Qalatasaray" azarkeşi olacaq. Bakıda "Qalatasaray" tərəfdarlarının sayı çoxdu. Çox istəyirik ki, azarkeşlərimiz oyundan həzz alsınlar.

- Bildiyim qədər "Qalatasaray"la oyuna bilet əldə etmək üçün çox sayda insan “Qarabağ”ın əməkdaşlarına müraciət edirlər. Sizə də belə müraciətlər olur?
- Bu vaxta kimi kimə bilet vermişəmsə, bu dəfə heç kimə verməyəcəm. Bu matçın məqsədi bəllidi. İnsanlar özləri başa düşürlər. Bəzi dostlar zarafatla dedilər. Zarafatla da olsa, mən də fikrimi bildirdim. Məqsədimiz bacardığımız qədər yardım etməkdi. Ordakı insanların buna ehtiyacı var. Türkiyə bizim qardaş ölkədi. Həmişə bir yerdə olmuşuq. Türkiyəyə öz evimiz kimi getmişik.