Tur “Girəsunspor”la “Fatih Karagümrük”ün qollu heç-heçəsi ilə başladı. “Fatih Karagümrük” superliqada məğlubiyyətsiz seriyanı 9 oyuna yüksəltməklə tarixinin elitadakı ən yaxşı göstəricisinə imza atdı.

"Football-plus.az" xəbər verir ki, şənbə günü 2 oyun keçirildi. “Antalyaspor” gözlənilmədən “Kayserispor”u darmadağın etdi. “Qalatasaray” fanatlarının da intizarına son qoyuldu. Onların sevimliləri 34 günlük fasilədən sonra ilk dəfə rəsmi oyuna çıxdı. “Kasımpaşa”nı çalışdıran Səlcuk İnan məşqçi karyerasında ilk dəfə “Cim-Bom”a, yəni futbolçu kimi 9 il şərəfini qoruduğu və 15 titul qazandığı komandaya rəqib oldu. “Qalatasaray” oyuna üzərində “Birlikdə 1905” yazılmış xüsusi qara formayla çıxdı. Oyundan sonra bu formalar satışa çıxarıldı. Yeni transfer Adekuqbe ilk oyununa çıxdısa, zədəsini sağaldan Muslera da start heyətindəki yerini aldı.

45 mindən çox azarkeşin izlədiyi oyunun ilk yarısında “sarı-qırmızılar” inamlı təsir bağışlamadı. Komandanın tempi aşağı, qol imkanları az idi. Üstəlik Mata da zədələnərək əvəzləndi. Okan Buruk fasilədə ikili əvəzetməyə əl atdı və bu addım özünü doğrultdu. Komandanın oyununu gücləndirən italiyalı ulduz Zanyolo qapıya vurduğu ilk zərbə ilə Türkiyə karyerasında qol hesabını açdı! “Qalatasaray”da ilk superliqa oyununda qol vuran sonuncu futbolçu 2021-in avqustunda Çikıldau olmuşdu. Qalan dəqiqələrdə başqa qol olmadı və “Aslan” ənənsinə sadiq qalaraq 1 top fərqi ilə qalib gəldi. Komanda bu mövsüm 19 qələbədən 13-nü məhz bu şəkildə əldə edib! “Fənərbaxça” bu tur oynamadığı üçün zirvədə xal fərqi 9-a yüksəldi. İstanbul təmsilçilərinə qarşı ardıcıl 9-cu qələbəsini qazanan “Cim-Bom” “Fənərbaxça”nın 1962-ci ildə müəyyənləşdirdiyi rekordu təkrarladı.

Bazar günü daha 3 oyun keçirildi. “Alanyaspor”u 2 cavabsız qolla yenən “Ankaragücü” bu mövsüm ilk dəfə ev oyununda top buraxmadan qələbə qazandı. Ərsun Yanal alanyalıların başında ilk məğlubiyyətini yaşadı. Turun maraqlı oyunlarından biri Trabzonda baş tutdu. Avcının istefasından sonra “Trabzonspor”u heç də zəif olmayan “Adana Dəmirspor”la oyuna onun köməkçisi Orhan Ak çıxarmışdı. Maraqlıdı ki, təcrübəli məşqçinin istefasından dərhal sonra komanda parlaq qələbə qazandı. Düzdü, qonaqların məğlubiyyətində artıq 22-ci dəqiqədə rəqibin üzünə zərbə endirdiyi üçün qırmızı vərəqə alan Belhandanın məsuliyyətsizliyi də az rol oynamadı. Mərakeşli futbolçu Türkiyədə oynamağa başladığı 2017/18 mövsümündən bəri 6-cı dəfə meydanda qovuldu. Bu müddətdə ondan çox qırmızı vərəqə alan yoxdu! Belhanda bu “qırmızı”lardan 4-nü “Qalatasaray”ın heyətində alıb. Visça meydana çıxandan sonra rəqibi “ağ bayraq qaldırmağa” məcbur edən son çempion bu mövsüm superliqada 2-ci dəfə bir oyunda 4 top vurdu. “Trabzonspor”un bu rəqibini evdə ardıcıl 8-ci oyunda məğlub etdiyini də vuğulayaq.

“Fatih Terim”də keçirilən turun mərkəzi oyununun axarına da erkən qırmızı vərəqə təsir göstərdi. Son vaxtlar enişdə olan “İstanbul BŞ” “Beşiktaş”a müqavimət göstərə bilmədi. Abubakarın qolundan sonra hesabda geri düşən meydan sahibləri 35-ci dəqiqədə azlıqda qaldılar. Bir müddət öncə icarəyə götürülən Yanuzay Fernandeşə qarşı kobduluğa görə qırmızı vərəqə aldı. Müdafiədə etibarlı təsir bağışlayan İstanbul nəhəngi fasilədən sonra Masuaku ilə daha bir qol vuraraq rahat qələbə qazandı. Başakşəhərlilərin çalışdırıcısı Əmrə Belözoğlu matç ərzində bir neçə dəfə “Beşiktaş” fanatları ilə münaqişə yaşadı. “İstanbul BŞ” ardıcıl 3-cü superliqa oyununda qol vurmadan məğlub olaraq antirekordunu təkrarladı.

ƏLİ